సైబర్ నేరాలపై అప్రమత్తంగా ఉండాలి విద్యార్థులకు సైబర్ సీపీ డాక్టర్ ఎం. రమేష్ సూచన
గచ్చిబౌలి,మేజర్ న్యూస్ : డిజిటల్‌ వేదికలను వినియోగించేటప్పుడు ప్రతి ఒక్కరూ అప్రమత్తంగా ఉండాలని సైబరాబాద్‌ పోలీస్‌ కమిషనర్‌ డాక్టర్ ఎం. రమేష్ సూచించారు. సైబర్ నేరాల నివారణ, డిజిటల్‌ భద్రతపై ప్రజల్లో అవగాహన కల్పించేందుకు నవంబరు నెలను సైబర్ క్రైమ్‌ అవేర్‌నెస్‌ మంత్‌గా నిర్వహిస్తున్నట్లు తెలిపారు. ఇందులో భాగంగా బుధవారం సైబరాబాద్‌ పోలీస్‌ కమిషనరేట్‌ ఆడిటోరియంలో నిర్వహించిన పోస్టర్ల ఆవిష్కరణ కార్యక్రమంలో ఆయన పాల్గొన్నారు. సుమారు 200 మంది విద్యార్థులు హాజరయ్యారు.ఈ సందర్భంగా కమిషనర్‌ మాట్లాడుతూ.. వ్యక్తిగత, ఆర్థిక సమాచారాన్ని ఇతరులతో పంచుకోవద్దని సూచించారు. ఓటీపీలు, యూపీఐ పిన్‌లు, పాస్‌వర్డ్‌లు, బ్యాంకు వివరాలను ఎవరికీ వెల్లడించకూడదన్నారు. అనుమానాస్పద లింకులను క్లిక్‌ చేయడం, గుర్తుతెలియని ఏపీకే ఫైళ్లను డౌన్‌లోడ్‌ చేయడం మానుకోవాలన్నారు. నకిలీ పెట్టుబడి పథకాలు, ఉద్యోగాల పేరుతో జరిగే మోసాలు, డిజిటల్‌ అరెస్టు వంటి సైబర్ నేరాల పట్ల అప్రమత్తంగా ఉండాలని సూచించారు.గుర్తుతెలియని కస్టమర్‌ కేర్‌ నంబర్లను, అనుమానాస్పద వీడియో కాల్స్‌ను నమ్మవద్దని తెలిపారు. సామాజిక మాధ్యమ ఖాతాలకు టూ ఫ్యాక్టర్‌ అథెంటికేషన్‌ (2FA) తప్పనిసరిగా ఏర్పాటు చేసుకోవాలన్నారు. పిల్లలకు సైబర్ వేధింపులు, ఆన్‌లైన్‌ గేమింగ్‌ మోసాలు, నకిలీ ప్రొఫైల్స్‌పై అవగాహన కల్పించాలని సూచించారు.
మోసపోతే వెంటనే ఫిర్యాదు చేయాలి....
సైబర్ ఆర్థిక మోసానికి గురైతే ఆలస్యం చేయకుండా 1930 హెల్ప్‌లైన్‌కు ఫోన్‌ చేయాలని, www.cybercrime.gov.in వెబ్‌సైట్‌లో ఫిర్యాదు చేయాలని కమిషనర్‌ సూచించారు. సకాలంలో ఫిర్యాదు చేయడం ద్వారా ఆర్థిక నష్టాన్ని తగ్గించడంతోపాటు నేరగాళ్లపై చర్యలు తీసుకునే అవకాశం ఉంటుందన్నారు.ఈ కార్యక్రమంలో జాయింట్‌ పోలీస్‌ కమిషనర్‌ సన్‌ప్రీత్‌ సింగ్‌, సైబర్ క్రైమ్స్‌ డీసీపీ పుష్ప తదితరులు పాల్గొన్నారు. సైబర్ నేరాల నివారణ పోలీసుల బాధ్యత మాత్రమే కాదని, ప్రతి పౌరుడూ డిజిటల్‌ భద్రతా నియమాలు పాటిస్తూ సమాజంలో అవగాహన కల్పించాలని కమిషనర్‌ పిలుపునిచ్చారు.
