రేవంత్ ప్రభుత్వాన్ని కూల్చే వరకు తిరుగుతా.. నిధులు తెప్పించలేకపోతే రాజకీయాల నుంచి తప్పుకుంటా: ఎంపీ ఈటల రాజేందర్

మేడ్చల్ జిల్లా ప్రధాన ప్రతినిధి, మేజర్ న్యూస్: జవహర్‌నగర్ డంపింగ్ యార్డు సమస్యపై చేపట్టిన పాదయాత్రలో మల్కాజిగిరి ఎంపీ ఈటల రాజేందర్ సంచలన వ్యాఖ్యలు చేశారు. డంపింగ్ యార్డును తొలగించాలని తాను పాదయాత్ర చేస్తుంటే.. ఈటల రాజేందర్‌కు పనిలేక తిరుగుతున్నాడని కాంగ్రెస్ నాయకులు అంటున్నారట అంటూ ఘాటుగా స్పందించారు. "నేను డంపింగ్ యార్డు సమస్య పరిష్కారం కోసం మాత్రమే తిరగడం లేదు.. మీ ప్రభుత్వాన్ని కూల్చే వరకు తిరుగుతా" అంటూ రేవంత్ ప్రభుత్వంపై తీవ్ర వ్యాఖ్యలు చేశారు.జవహర్‌నగర్ డంపింగ్ యార్డులో వ్యర్థాల రీసైక్లింగ్ కోసం ఎంత ఖర్చవుతుందో సమగ్ర డీపీఆర్ (డిటైల్డ్ ప్రాజెక్ట్ రిపోర్ట్) రూపొందించి ఇవ్వాలని కోరారు. ఆ నివేదిక ఆధారంగా ప్రధానమంత్రి నరేంద్ర మోదీని ఒప్పించి అవసరమైన నిధులు తీసుకొస్తానని స్పష్టం చేశారు. కేంద్రం నుంచి నిధులు తీసుకురావడానికి తాను సిద్ధంగా ఉన్నానని పేర్కొంటూ.. "అలా నిధులు తీసుకురాలేకపోతే రాజకీయాల నుంచి తప్పుకుంటా" అంటూ సవాల్ విసిరారు.జవహర్‌నగర్ డంపింగ్ యార్డు సమస్యకు శాశ్వత పరిష్కారం చూపాలని, ప్రజలు ఎదుర్కొంటున్న ఇబ్బందులను తొలగించేందుకు ప్రభుత్వం చర్యలు తీసుకోవాలని ఈటల రాజేందర్ డిమాండ్ చేశారు. పాదయాత్ర సందర్భంగా ఆయన చేసిన వ్యాఖ్యలు మేడ్చల్ జిల్లా రాజకీయాల్లో చర్చనీయాంశంగా మారాయి.