రెండు ఎమ్మెల్సీ స్థానాల్లో గులాబీ జెండా ఎగరేయాలి -- పార్టీ శ్రేణులకు మాజీ ఎమ్మెల్యే ఎస్. రాజేందర్ రెడ్డి పిలుపు

*నారాయణపేట, సూర్యన్యూస్:*   త్వరలో జరగనున్న రెండు ఎమ్మెల్సీ ఎన్నికలను పార్టీ నాయకులు, కార్యకర్తలు ప్రతిష్ఠాత్మకంగా తీసుకొని పనిచేయాలని మాజీ ఎమ్మెల్యే ఎస్. రాజేందర్ రెడ్డి పిలుపునిచ్చారు. శనివారం జిల్లా పార్టీ కార్యాలయంలో ఆయన అధ్యక్షతన ఎమ్మెల్సీ ఎన్నికల సన్నాహక సమావేశం నిర్వహించారు. ఈ సందర్భంగా రాజేందర్ రెడ్డి మాట్లాడుతూ.. రానున్న రెండు ఎమ్మెల్సీ ఎన్నికల్లోనూ గులాబీ జెండా ఎగరేయడమే లక్ష్యంగా పార్టీ శ్రేణులు సమష్టిగా కృషి చేయాలన్నారు. ఎన్నికల్లో విజయం సాధించేందుకు ఇప్పటి నుంచే ప్రణాళికాబద్ధంగా ముందుకు సాగాలని సూచించారు. పార్టీ నాయకులు, కార్యకర్తలు ఎన్నికలను ప్రతిష్ఠాత్మకంగా తీసుకొని పట్టుదలతో పనిచేయాలని, రెండు స్థానాల్లోనూ గెలుపే లక్ష్యంగా కార్యాచరణ రూపొందించుకోవాలని అన్నారు. ఓటర్ల నమోదుపై ప్రత్యేక దృష్టి సారించనున్నట్లు ఆయన తెలిపారు. ప్రతి వంద మంది ఓటర్లకు ఒకరి చొప్పున ఇన్‌చార్జిలను నియమించి, అర్హులైన ఓటర్లు తమ పేర్లను నమోదు చేసుకునేలా అవగాహన కల్పిస్తామని పేర్కొన్నారు. ఓటర్ల నమోదుతోపాటు ఎన్నికల సన్నాహాలను వేగవంతం చేసి, రెండు ఎమ్మెల్సీ స్థానాల్లోనూ విజయం సాధించే దిశగా పార్టీ శ్రేణులు కృషి చేయాలని రాజేందర్ రెడ్డి పిలుపునిచ్చారు.
-- రాజేష్ కుమార్, సూర్య రిపోర్టర్, నారాయణపేట.