telangana
రెడ్‌క్రాస్‌ సేవలను విస్తృతం చేయాలి
సూర్య, ఆదిలాబాద్‌, అక్టోబరు 29: జిల్లాలో ఇండియన్‌ రెడ్‌క్రాస్‌ సొసైటీ సేవలను మరింత విస్తృతం చేయాలని కలెక్టర్‌ రాజర్షిషా సూచించారు. సంస్థ ఎదుర్కొంటున్న సమస్యల పరిష్కారానికి కృషి చేస్తామని తెలిపారు. గురువారం కలెక్టరేట్‌ క్యాంపు కార్యాలయంలో ఐఆర్‌సీఎస్‌ ప్రతినిధులతో నిర్వహించిన సమీక్ష సమావేశంలో ఆయన మాట్లాడారు.రెడ్‌క్రాస్‌ ద్వారా ప్రజలకు వైద్య సేవలు, రక్తదాన శిబిరాలు, ఇతర సేవా కార్యక్రమాలను నిరంతరం అందించాలని సూచించారు. నూతన బ్లడ్‌ బ్యాంక్‌ మంజూరుకు అవసరమైన చర్యలు తీసుకోవాలని, సంస్థ నిర్వహణలో పారదర్శకత పాటించాలని స్పష్టం చేశారు. కైలాస్‌నగర్‌ వైట్ క్వార్టర్స్‌లో శిథిలావస్థకు చేరిన రెడ్‌క్రాస్‌ భవనానికి తాత్కాలిక మరమ్మతులు చేపట్టడం లేదా ప్రభుత్వం కేటాయించిన స్థలంలో నూతన భవనం నిర్మించేందుకు అవసరమైన వసతులు కల్పించే అంశాలపై చర్చించారు. అనంతరం రెడ్‌క్రాస్‌ సభ్యులకు గుర్తింపు కార్డులను అందజేశారు.సమావేశంలో స్థానిక సంస్థల అదనపు కలెక్టర్‌ ఎస్‌.రాజేశ్వర్‌, ఐఆర్‌సీఎస్‌ చైర్మన్‌ ఆడె క్రాంతి కుమార్‌, వైస్‌ చైర్మన్‌ మనోహర్‌రావు, రాష్ట్ర కమిటీ సభ్యుడు ఎన్‌.రాజేశ్వర్‌రావు, రిమ్స్‌ డైరెక్టర్‌ జైసింగ్‌ రాథోడ్‌, సభ్యులు పార్థసారథి, రూపేష్‌రెడ్డి, అనిల్‌, సంజయ్‌, విశ్వనాథ్‌, కృష్ణ, ప్రవీణ్‌కుమార్‌ తదితరులు పాల్గొన్నారు.
