రైతులు రీ సర్వేకు సహకరించాలి - చామనపల్లి ముంపు గ్రామ తరలింపు మూడు నెలల్లో పూర్తి చేయాలి

సూర్య – పెద్దపల్లి:

భూముల రీ సర్వేకు రైతులందరూ పూర్తిస్థాయిలో సహకరించాలని జిల్లా కలెక్టర్ కోయ శ్రీహర్ష కోరారు. సర్వే సమయంలో రైతులు అందుబాటులో ఉండి తమ భూముల హద్దులను క్షుణ్ణంగా పరిశీలించుకోవాలని సూచించారు.గురువారం ధర్మారం మండలం శాయంపేట, చామనపల్లి, జూలపల్లి మండలం కాచాపూర్ గ్రామాల్లో జరుగుతున్న భూముల రీ సర్వే, చామనపల్లిలో సోషల్ ఎకనామిక్ సర్వేను కలెక్టర్ పరిశీలించారు. సర్వే వివరాలు పారదర్శకంగా నమోదు చేయాలని అధికారులను ఆదేశించారు. సర్వే అనంతరం అభ్యంతరాలకు అవకాశం కల్పిస్తామని, రైతులు ఆందోళన చెందాల్సిన అవసరం లేదన్నారు.చామనపల్లి ముంపు గ్రామ తరలింపు ప్రక్రియను మూడు నెలల్లో పూర్తి చేయాలని, అర్హులైన ప్రతి కుటుంబానికి ఆర్‌అండ్‌ఆర్‌ ప్యాకేజీ అందేలా చర్యలు తీసుకోవాలని సూచించారు. అనంతరం జూలపల్లి మండల పరిషత్ ప్రాథమికోన్నత పాఠశాలను ఆకస్మికంగా తనిఖీ చేసి విద్యార్థులకు నాణ్యమైన విద్య, అల్పాహారం అందించాలని ఉపాధ్యాయులకు సూచించారు. ఈ పర్యటనలో ధర్మారం తహసీల్దార్ శ్రీనివాస్, జూలపల్లి తహసీల్దార్ దత్తు ప్రసాద్ తదితరులు పాల్గొన్నారు.