రాహుల్ రీలాంచ్ కోసమే ప్రజాధనం దుర్వినియోగం!

హైదరాబాద్:కాంగ్రెస్ నిర్వహించిన భారత్‌ సమ్మిట్‌పై బిజెపి నాయకుడు రాంచందర్‌రావు తీవ్రస్థాయిలో ధ్వజమెత్తారు. ఈ సమ్మిట్ కేవలం రాహుల్ గాంధీ మరో విఫల రీలాంచ్ ప్రయత్నమేనని ఆయన ఎద్దేవా చేశారు. రాహుల్ గాంధీ రాజకీయ పునరుజ్జీవం కోసం తెలంగాణ కాంగ్రెస్ ప్రభుత్వం రాష్ట్ర ఖజానాను విచ్చలవిడిగా ఖర్చు చేస్తోందని ఆరోపించారు. ప్రభుత్వం ఇచ్చిన హామీలను నెరవేర్చడంలో పూర్తిగా విఫలమైందని, ఒకవైపు నిరుద్యోగ యువత ఉద్యోగాల కోసం ఏళ్లతో ఎదురుచూస్తుంటే, మరోవైపు రైతులకు రావాల్సిన రైతుబంధు సాయం కూడా అందడం లేదని మండిపడ్డారు. తెలంగాణ ఖజానా అనేది గాంధీ కుటుంబ పునరావాస నిధి కాదని తీవ్ర వ్యాఖ్యలు చేశారు. రాహుల్ వ్యక్తిగత రాజకీయ ప్రయోజనాల కోసం ప్రజాధనాన్ని దుర్వినియోగం చేయకూడదని, వెంటనే ఇలాంటి వ్యర్థ ఖర్చులను నిలిపివేయాలని రాంచందర్‌రావు డిమాండ్ చేశారు.