ప్రపంచ మార్కెట్ లోకి ములకనూరు బియ్యం

భీమదేవరపల్లి, మేజర్ న్యూస్, అంతర్జాతీయ మార్కెట్లలో తెలంగాణ రైతుల ఉత్పత్తులకు గుర్తింపు తీసుకురావడమే లక్ష్యంగా ములుకనూరు సహకార సంఘం ముందడుగు వేసింది. అక్టోబర్ 31 నుంచి నవంబర్ 6 వరకు దక్షిణ కొరియాలో జరిగిన వ్యాపార ప్రతినిధి బృందం పర్యటనలో సంఘం అధ్యక్షుడు అలిగిరెడ్డి ప్రవీణ్ రెడ్డి పాల్గొన్నారు. ఈ సందర్భంగా అక్కడి ఆహార పరిశ్రమలు, ఆధునిక ఉత్పత్తి, శుద్ధి, ప్యాకేజింగ్ విధానాలను పరిశీలించారు. ఆహార పరిశ్రమల కేంద్రం, జాతీయ మత్స్య విజ్ఞాన ప్రదర్శనశాల, సియోల్‌లో నిర్వహించిన అంతర్జాతీయ ఆహార ప్రదర్శనను సందర్శించారు. ములుకనూరు బియ్యం, విత్తనాల బ్రాండ్లకు ప్రపంచస్థాయి గుర్తింపు తీసుకురావడంతో పాటు అమెరికా తదితర దేశాలకు బియ్యం ఎగుమతి అవకాశాలను విస్తరిస్తామని ప్రవీణ్ రెడ్డి తెలిపారు. పర్యటనలో నేర్చుకున్న ఆధునిక పరిజ్ఞానం, ఏర్పడిన వ్యాపార సంబంధాలు తెలంగాణ రైతుల అభివృద్ధికి దోహదపడతాయని పేర్కొన్నారు.

రిపోర్టర్; రామకృష్ణ, భీమదేవరపల్లి, హనుమకొండ జిల్లా