ప్రజావాణి అర్జీలను వెంటనే పరిష్కరించాలి పెండింగ్‌లో ఉంచకుండా చర్యలు తీసుకోవాలి.. కలెక్టర్ కోయ శ్రీహర్ష
సూర్య పెద్దపల్లి ప్రతినిధి
ప్రజావాణి కార్యక్రమంలో ప్రజల నుంచి స్వీకరించిన దరఖాస్తులకు అత్యంత ప్రాధాన్యతనిస్తూ, పెండింగ్‌లో ఉంచకుండా సత్వరమే పరిష్కరించాలని జిల్లా కలెక్టర్ కోయ శ్రీహర్ష అధికారులను ఆదేశించారు.సోమవారం కలెక్టరేట్ సమావేశ మందిరంలో అదనపు కలెక్టర్ బి. శ్రీరాములుతో కలిసి నిర్వహించిన ప్రజావాణిలో ప్రజల నుంచి వివిధ సమస్యలపై అర్జీలను స్వీకరించారు.ధర్మారం మండలం కొత్తూరుకు చెందిన జోగుల లచ్చయ్య తన ఏడు గుంటల భూమికి పట్టాదారు హక్కులు కల్పించాలని, శ్రీరాంపూర్ మండలం తారుపల్లికి చెందిన జాసోదపు లక్ష్మి ఇందిరమ్మ ఇల్లు మంజూరు చేయాలని కోరారు. మంథని మండలం నాగారానికి చెందిన గాజుల ప్రశాంత్ ప్రభుత్వ ఉద్యోగ అవకాశం కల్పించాలని, గోదావరిఖని 18 ఇంక్లైన్ కాలనీకి చెందిన గంట నరసమ్మ గృహజ్యోతి పథకం వర్తింపజేయాలని దరఖాస్తులు సమర్పించారు.ఈ అర్జీలను సంబంధిత శాఖల అధికారులకు పంపిస్తూ, క్షేత్రస్థాయిలో పరిశీలించి నిబంధనల ప్రకారం త్వరితగతిన పరిష్కరించాలని కలెక్టర్ ఆదేశించారు. కార్యక్రమంలో సంబంధిత జిల్లా అధికారులు పాల్గొన్నారు.
