ప్రగతి నగర్ ప్రభుత్వ పాఠశాల భూ పరిరక్షణకు భారీ ర్యాలీ*

                        పాఠశాల స్థలాన్ని ప్రభుత్వం వెంటనే నోటిఫై చేయాలి: జేఏసీ డిమాండ్

నిజాంపేట్ మేజర్ న్యూస్ :ప్రగతి నగర్ జడ్పీ ప్రభుత్వ ఉన్నత పాఠశాల భూ పరిరక్షణ కోసం జెడ్పీహెచ్ఎస్ ప్రగతి నగర్ జేఏసీ ఆధ్వర్యంలో శుక్రవారం భారీ ర్యాలీ నిర్వహించారు. మధ్యాహ్నం 3 గంటలకు ప్రభుత్వ పాఠశాల నుంచి ప్రారంభమైన ఈ ర్యాలీ ఆల్విన్ చౌరస్తా మీదుగా వాసవి లేఅవుట్ వరకు కొనసాగింది. విద్యార్థులు, తల్లిదండ్రులు, జేఏసీ నాయకులు, స్థానిక ప్రజలు పెద్ద సంఖ్యలో పాల్గొని పాఠశాల భూమిని కాపాడాలంటూ నినాదాలు చేశారు. పాఠశాలకు సంబంధించిన 1.06 ఎకరాల స్థలాన్ని పూర్తి స్థాయిలో పరిరక్షించాలని, భూమిని ప్రభుత్వం అధికారికంగా నోటిఫై చేయాలని జేఏసీ నాయకులు డిమాండ్ చేశారు. ప్రభుత్వ పాఠశాల అభివృద్ధికి అవసరమైన నిధులు కేటాయించి, విద్యార్థులకు మెరుగైన మౌలిక వసతులు కల్పించాలని కోరారు. పాఠశాల స్థలంపై వస్తున్న ఆక్రమణ ఆరోపణలపై సమగ్ర విచారణ చేపట్టి, ప్రభుత్వ భూమికి రక్షణ కల్పించాలని విజ్ఞప్తి చేశారు. ఈ ర్యాలీకి సంఘీభావం తెలిపిన కాంగ్రెస్ పార్టీ మాజీ జనరల్ సెక్రటరీ భూపతిరెడ్డి మాట్లాడుతూ పాఠశాల స్థల పరిరక్షణకు తమ వంతు బాధ్యత తీసుకుంటామని హామీ ఇచ్చారు. ప్రభుత్వ పాఠశాల భూమి భవిష్యత్తులో అన్యాక్రాంతం కాకుండా అధికారులు చర్యలు తీసుకోవాలని ఆయన కోరారు. కాగా, కార్యక్రమం ముగింపు సమయంలో డీఈఓ వ్యవహరించిన తీరుపై విద్యార్థులు, తల్లిదండ్రులు, జేఏసీ నాయకులు తీవ్ర అసంతృప్తి వ్యక్తం చేశారు. పాఠశాల స్థలాన్ని పరిరక్షించాల్సిన విద్యాశాఖ అధికారులు ఈ విషయంలో తగిన శ్రద్ధ చూపకపోవడం విచారకరమని వారు పేర్కొన్నారు. పాఠశాల భూమికి అధికారికంగా రక్షణ కల్పించే వరకు తమ పోరాటాన్ని కొనసాగిస్తామని జేఏసీ నాయకులు స్పష్టం చేశారు. పాఠశాల స్థలాన్ని ప్రభుత్వం అధికారికంగా నోటిఫై చేసి, భవిష్యత్‌లో ఎలాంటి ఆక్రమణలకు తావులేకుండా చర్యలు తీసుకోవాలని వారు డిమాండ్ చేశారు. ఈ కార్యక్రమంలో జెడ్పీహెచ్ఎస్ ప్రగతి నగర్ జేఏసీ నాయకులు, విద్యార్థులు, తల్లిదండ్రులు, స్థానిక ప్రజలు పెద్ద సంఖ్యలో పాల్గొన్నారు.