ఇన్ముల్నర్వ ప్లాట్ల ఈ-వేలానికి భారీ స్పందన
45 నివాస ప్లాట్ల విక్రయానికి ముందు హెచ్‌ఎండీఏ ప్రీ-బిడ్ సమావేశం
. . బిడ్డర్ల సందేహాలకు అధికారుల సమాధానాలు
హైదరాబాద్ మేజర్ న్యూస్ (సిటీ ప్రతినిధి):ఇన్ముల్నర్వ లేఅవుట్‌లోని నివాస ప్లాట్ల ఈ-వేలానికి ఔత్సాహిక బిడ్డర్ల నుంచి విశేష స్పందన లభించింది. హైదరాబాద్ మెట్రోపాలిటన్ డెవలప్‌మెంట్ అథారిటీ (హెచ్‌ఎండీఏ) ఆధ్వర్యంలో శుక్రవారం నిర్వహించిన ప్రీ-బిడ్ సమావేశానికి పలువురు ఆసక్తిగల బిడ్డర్లు హాజరై వేలం ప్రక్రియకు సంబంధించిన వివరాలను తెలుసుకున్నారు.
ఇన్ముల్నర్వ లేఅవుట్‌లో మొత్తం 45 నివాస ప్లాట్లను ఈ-వేలం ద్వారా విక్రయించేందుకు హెచ్‌ఎండీఏ ఏర్పాట్లు చేస్తోంది. ఈ నేపథ్యంలో నిర్వహించిన ప్రీ-బిడ్ సమావేశంలో లేఅవుట్ ప్రత్యేకతలు, రవాణా సౌకర్యాలు, అందుబాటులో ఉన్న మౌలిక వసతులు, పరిసర ప్రాంతాల్లో భవిష్యత్తు అభివృద్ధి అవకాశాలను అధికారులు వివరించారు.
లేఅవుట్ ప్రత్యేకతలపై కేపీఎంజీ ప్రజెంటేషన్
హెచ్‌ఎండీఏ లావాదేవీల సలహాదారు సంస్థ కేపీఎంజీ ప్రతినిధి కల్యాణ్ ఇన్ముల్నర్వ లేఅవుట్‌కు ఉన్న రవాణా అనుసంధానం, మౌలిక సదుపాయాలు, పరిసర ప్రాంతాల్లో అభివృద్ధి అవకాశాలపై సమగ్ర ప్రజెంటేషన్ ఇచ్చారు. ఈ-వేలంలో పాల్గొనేందుకు అవసరమైన రిజిస్ట్రేషన్ ప్రక్రియ, నిబంధనలు, విధివిధానాలను ఎంఎస్‌టీసీ లిమిటెడ్ ప్రతినిధి దినేష్ వివరించారు.
బిడ్డర్ల సందేహాలకు అధికారుల వివరణ
ఈ సందర్భంగా ఔత్సాహిక బిడ్డర్లు అడిగిన పలు ప్రశ్నలకు హెచ్‌ఎండీఏ అధికారులు సమాధానాలు ఇచ్చారు. ముఖ్యంగా బిడ్డింగ్ ప్రక్రియ, ఎర్నెస్ట్ మనీ డిపాజిట్ (ఈఎండీ), చెల్లింపుల నిబంధనలు, లేఅవుట్ అభివృద్ధి ప్రమాణాలపై స్పష్టతనిచ్చారు. వేలంలో పాల్గొనే వారు ముందుగా నిబంధనలను పూర్తిగా తెలుసుకుని రిజిస్ట్రేషన్ చేసుకోవాలని సూచించారు.
ఈ సమావేశంలో హెచ్‌ఎండీఏ అధికారులు ఈఈ దన్మోహన్ సింగ్, తహసీల్దార్ వై.టి. వెంకటేశ్వర్లు, డీఈఈ అభిలాష్, ఏఈఈ శ్రవణ్ తదితరులు పాల్గొన్నారు.
నవంబర్ 23న ఈ-వేలం.. 21తో ముగియనున్న రిజిస్ట్రేషన్
ఇన్ముల్నర్వ లేఅవుట్‌లోని 45 నివాస ప్లాట్లకు సంబంధించిన ఈ-వేలం 2026 నవంబర్ 23న నిర్వహించనున్నారు. వేలంలో పాల్గొనాలనుకునే వారు నవంబర్ 21వ తేదీలోగా రిజిస్ట్రేషన్ ప్రక్రియను పూర్తి చేయాల్సి ఉంటుంది.
మరిన్ని వివరాలు, సహాయం కోసం ఆసక్తిగల వారు హెచ్‌ఎండీఏ హెల్ప్‌లైన్ నంబర్ 7416835522 ను సంప్రదించవచ్చు. ఈ-వేలం నిబంధనలు, రిజిస్ట్రేషన్, పాల్గొనే విధానాలకు సంబంధించిన పూర్తి వివరాలను హెచ్‌ఎండీఏ అధికారిక వెబ్‌సైట్ www.hmda.gov.in లో తెలుసుకోవచ్చని అధికారులు తెలిపారు.
