గిగ్ వర్కర్లకు 12 హామీలతో ప్రత్యేక సంక్షేమ విధానం.. రాహుల్ మాట ఇస్తే మట్టిలో కలిసినా తప్పరు: సీఎం రేవంత్ రెడ్డి

హైదరాబాద్: తెలంగాణ రాష్ట్రంలోని లక్షలాది మంది గిగ్ వర్కర్ల భద్రత, సంక్షేమం కోసం 12 ప్రధాన హామీలతో కూడిన ప్రత్యేక సంక్షేమ విధానాన్ని (గిగ్ వర్కర్స్ పాలసీ) రూపొందించినట్లు ముఖ్యమంత్రి ఎనుముల రేవంత్ రెడ్డి ప్రకటించారు. హైదరాబాద్‌లోని జయభేరి గ్రౌండ్స్‌లో నిర్వహించిన గిగ్ వర్కర్ల బహిరంగ సభలో కాంగ్రెస్ అగ్రనేత రాహుల్ గాంధీ చేతుల మీదుగా ఈ పాలసీని ప్రారంభించిన అనంతరం సీఎం ప్రసంగించారు.

ఈ చట్టం ద్వారా గిగ్ వర్కర్లందరికీ ప్రత్యేక గుర్తింపు కార్డులు జారీ చేయడంతో పాటు, ప్రత్యేక సంక్షేమ బోర్డు ఏర్పాటు చేసి వారిని అన్ని విధాలా ఆదుకుంటామని సీఎం భరోసా ఇచ్చారు. ఇది కేవలం నాలుగు గోడల మధ్య కూర్చుని తయారు చేసిన చట్టం కాదని, కార్మికుల కష్టాలను క్షేత్రస్థాయిలో తెలుసుకుని రూపొందించినదని ఆయన స్పష్టం చేశారు. నాడు భారత్ జోడో యాత్రలో గిగ్ వర్కర్లకు ఇచ్చిన హామీని నిలబెట్టుకుంటూ ఈ పథకాన్ని అమల్లోకి తెచ్చామని పేర్కొన్న రేవంత్ రెడ్డి, రాహుల్ గాంధీ ఒక్కసారి మాట ఇస్తే మట్టిలో కలిసినా మాట తప్పరని ఉద్ఘాటించారు.