ప్రభుత్వ పాఠశాల భూమి పరిరక్షణకు నవంబర్‌ 13న భారీ ర్యాలీ
నిజాంపేట్ మేజర్ న్యూస్ :ప్రగతినగర్‌ జడ్పీ ప్రభుత్వ ఉన్నత పాఠశాల భూమి పరిరక్షణ కోసం జేఏసీ ఆధ్వర్యంలో నవంబర్‌ 13న భారీ ర్యాలీ నిర్వహించనున్నట్లు జేఏసీ నాయకులు తెలిపారు. ఈ నేపథ్యంలో విద్యార్థులు, తల్లిదండ్రులతో సమావేశం నిర్వహించి పాఠశాల స్థలాన్ని పరిరక్షించాల్సిన ఆవశ్యకతపై అవగాహన కల్పించారు. ఈ సందర్భంగా జేఏసీ నాయకులు మాట్లాడుతూ నవంబర్‌ 13వ తేదీ శుక్రవారం మధ్యాహ్నం 2 గంటలకు విద్యార్థులు, తల్లిదండ్రులు, ప్రజా సంఘాలు, స్థానిక ప్రజల భాగస్వామ్యంతో భారీ స్కూల్‌ పరిరక్షణ ర్యాలీ నిర్వహించనున్నట్లు తెలిపారు. పాఠశాల స్థలాన్ని శాశ్వతంగా ప్రభుత్వ ఆధీనంలోనే పరిరక్షించాలని, భూమికి సంబంధించి వస్తున్న ఆక్రమణ ఆరోపణలపై సమగ్ర విచారణ జరిపించాలని డిమాండ్‌ చేశారు. అలాగే పాఠశాలకు అవసరమైన నిధులు, మౌలిక వసతులు, తగిన సంఖ్యలో ఉపాధ్యాయులను ప్రభుత్వం కల్పించాలని కోరారు. “పాఠశాల భూమిని కాపాడుకుందాం.. విద్యార్థుల భవిష్యత్తును రక్షించుకుందాం” అనే నినాదంతో నిర్వహించే ఈ ర్యాలీలో విద్యార్థులు, తల్లిదండ్రులు, ప్రజా సంఘాలు, స్థానికులు పెద్ద సంఖ్యలో పాల్గొని విజయవంతం చేయాలని జేఏసీ నాయకులు పిలుపునిచ్చారు. ఈ సమావేశంలో జేఏసీ నాయకులు ఆకుల సతీష్‌, వెంకటరామయ్య, మేడా శ్రీనివాస్, మల్యాల రమణి, మురళి, తులసిదాస్‌, లోకంనాథం, ఎల్లస్వామితో పాటు విద్యార్థులు, తల్లిదండ్రులు పాల్గొన్నారు.
