telangana
పంచలింగాల రైతు పొలంలో భారీ మొసలి.. తాళ్లతో బంధించి ఫారెస్ట్ అధికారులకు అప్పగింత
మర్పల్లి, మేజర్ న్యూస్ :మర్పల్లి మండల పరిధిలోని పంచలింగాల గ్రామంలో భారీ మొసలి ప్రత్యక్షమై కలకలం రేపింది. శనివారం రాత్రి గ్రామానికి సమీపంలోని రైతు పొలంలోకి మొసలి ప్రవేశించింది. ఆదివారం ఉదయం తన పొలానికి వెళ్లిన రైతు బందిగ మొగులయ్యకు రేకుల షెడ్డు సమీపంలో మొసలి కనిపించింది. దీంతో అప్రమత్తమైన ఆయన తోటి రైతులకు సమాచారం అందించగా, పలువురు రైతులు కలిసి మొసలిని తాళ్లతో బంధించారు.అనంతరం పొలం నుంచి మొసలిని కట్టెల సహాయంతో మెయిన్ రోడ్డు వద్దకు తీసుకురావడంతో గ్రామస్తులు, అటుగా వెళ్తున్న ప్రయాణికులు పెద్ద సంఖ్యలో అక్కడికి చేరుకుని ఆసక్తిగా తిలకించారు. భారీ మొసలి ప్రత్యక్షం కావడంతో గ్రామంలో కొద్దిసేపు ఉత్కంఠ నెలకొంది.సమాచారం అందుకున్న సంగారెడ్డి మంజీరా అభయారణ్యానికి చెందిన వన్యప్రాణి సిబ్బంది ఘటనా స్థలానికి చేరుకున్నారు. బంటారం ఫారెస్ట్ సెక్షన్ ఆఫీసర్ కిషన్ ఆధ్వర్యంలో మొసలిని స్వాధీనం చేసుకుని అటవీశాఖ అధికారులు సంగారెడ్డికి తరలించారు. మొసలిని ఫారెస్ట్ అధికారులకు అప్పగించడంతో గ్రామస్తులు ఊపిరి పీల్చుకున్నారు.
