పట్టభద్రుల ఓటు నమోదుకు మరో మూడు రోజులే గడువు అర్హులంతా వెంటనే దరఖాస్తు చేసుకోవాలి : షేక్ చాంద్ పాషా విజ్ఞప్తి

కొండాపూర్,మేజర్ న్యూస్ : పట్టభద్రుల ఎమ్మెల్సీ ఓటరు నమోదుకు గడువు సమీపిస్తున్న నేపథ్యంలో శేరిలింగంపల్లి నియోజకవర్గంలోని అర్హులైన పట్టభద్రులంతా వెంటనే దరఖాస్తు చేసుకోవాలని కాంగ్రెస్ పార్టీ సీనియర్ నాయకుడు షేక్ చాంద్ పాషా కోరారు. ఈ మేరకు ఆయన ఒక ప్రకటన విడుదల చేశారు.రంగారెడ్డి, మహబూబ్‌నగర్, హైదరాబాద్ పట్టభద్రుల ఎమ్మెల్సీ ఎన్నికల్లో పట్టభద్రుల ఓటు ఎంతో కీలకమని పేర్కొన్నారు. ప్రతి ఒక్కరూ తమ ఓటు హక్కును వినియోగించుకునేలా ముందుగానే ఓటరు జాబితాలో పేరు నమోదు చేసుకోవాలని సూచించారు.రాష్ట్రవ్యాప్తంగా పట్టభద్రుల ఓటరు నమోదు ప్రక్రియ కొనసాగుతోందని, ఫారం-18 ద్వారా దరఖాస్తు చేసుకునేందుకు ఈ నెల 6వ తేదీ వరకు మాత్రమే గడువు ఉందని తెలిపారు. గడువు ముగియడానికి మరో మూడు రోజులే మిగిలి ఉన్నందున అర్హులైన పట్టభద్రులు చివరి నిమిషం వరకు వేచి చూడకుండా వెంటనే దరఖాస్తు చేసుకోవాలని విజ్ఞప్తి చేశారు.శేరిలింగంపల్లి నియోజకవర్గంలోని పట్టభద్రులందరూ ఈ అవకాశాన్ని సద్వినియోగం చేసుకొని తమ ఓటు హక్కును కాపాడుకోవాలని షేక్ చాంద్ పాషా పిలుపునిచ్చారు.