పట్టభద్రుల ఎమ్మెల్సీ ఓటరు నమోదును వేగవంతం చేయాలి.. మూడు రోజులే గడువు : మాజీ ఎమ్మెల్యే డాక్టర్ మెతుకు ఆనంద్

మర్పల్లి, మేజర్ న్యూస్ : పట్టభద్రుల ఎమ్మెల్సీ ఓటరు నమోదు గడువు ముగియడానికి కేవలం మూడు రోజులు మాత్రమే మిగిలి ఉండటంతో అర్హులైన పట్టభద్రులందరూ ఓటర్లుగా నమోదు చేసుకునేలా పార్టీ శ్రేణులు సమన్వయంతో పనిచేయాలని వికారాబాద్ మాజీ ఎమ్మెల్యే డాక్టర్ మెతుకు ఆనంద్ సూచించారు. మర్పల్లి మండలం పట్లూర్ గ్రామంలో నిర్వహించిన పట్టభద్రుల ఎమ్మెల్సీ ఓటరు నమోదు సమీక్ష కార్యక్రమంలో ఆయన పాల్గొని నమోదు ప్రక్రియ పురోగతిని సమీక్షించారు. ఈ సందర్భంగా మాట్లాడుతూ గడువు తక్కువగా ఉన్నందున మిగిలిన మూడు రోజులను సద్వినియోగం చేసుకుని ఓటరు నమోదు ప్రక్రియను మరింత వేగవంతం చేయాలని బీఆర్ఎస్ నాయకులకు పిలుపునిచ్చారు. అనంతరం తుమ్మలపల్లి గ్రామంలో పార్టీ ముఖ్య నాయకులతో సమావేశమై గ్రామస్థాయిలో పార్టీ బలోపేతం, పార్టీ కార్యక్రమాల విస్తరణతో పాటు పట్టభద్రుల ఎమ్మెల్సీ ఓటరు నమోదు పరిస్థితిపై చర్చించారు. ప్రతి గ్రామంలో అర్హులైన పట్టభద్రులను గుర్తించి ఓటర్లుగా నమోదు చేయించేందుకు ప్రత్యేక కార్యాచరణ రూపొందించాలని, గ్రామాల వారీగా ఇన్‌చార్జీలకు బాధ్యతలు అప్పగించి నమోదు ప్రక్రియను పర్యవేక్షించాలని సూచించారు. గడువులోగా అర్హులైన పట్టభద్రులందరికీ ఓటు హక్కు కల్పించే దిశగా నాయకులు, కార్యకర్తలు క్షేత్రస్థాయిలో చురుకుగా పనిచేయాలని ఆయన కోరారు.