పదో తరగతి పబ్లిక్ పరీక్షల ఫీజు చెల్లింపులు ప్రారంభం నవంబర్ 16 వరకు సాధారణ ఫీజు చెల్లింపునకు అవకాశం: జిల్లా విద్యాశాఖ అధికారి ఏ. రమేష్ కుమార్

నాగర్ కర్నూల్ రూరల్,సూర్య న్యూస్ : వచ్చే ఏడాది మార్చిలో నిర్వహించనున్న 2027 పదో తరగతి వార్షిక పబ్లిక్ పరీక్షలకు సంబంధించి పరీక్ష ఫీజు చెల్లింపు షెడ్యూల్‌ను ప్రభుత్వ పరీక్షల విభాగం విడుదల చేసిందని నాగర్ కర్నూల్ జిల్లా విద్యాశాఖ అధికారి ఏ. రమేష్ కుమార్  ఒక ప్రకటనలో తెలిపారు.విద్యార్థులు అక్టోబర్ 30 నుంచి నవంబర్ 16వ తేదీ వరకు ఎలాంటి ఆలస్య రుసుము లేకుండా రూ.125 పరీక్ష ఫీజు చెల్లించవచ్చని పేర్కొన్నారు. నిర్ణీత గడువులోగా ఫీజు చెల్లించలేని విద్యార్థుల కోసం ఆలస్య రుసుముతో అదనపు గడువులు కల్పించినట్లు తెలిపారు.

పరీక్ష ఫీజు చెల్లింపు తేదీలు
- అక్టోబర్ 30 నుంచి నవంబర్ 16 వరకు: రూ.125 (ఆలస్య రుసుము లేదు)
- నవంబర్ 18 నుంచి డిసెంబర్ 1 వరకు: రూ.50 ఆలస్య రుసుముతో
- డిసెంబర్ 3 నుంచి డిసెంబర్ 14 వరకు: రూ.200 ఆలస్య రుసుముతో
- డిసెంబర్ 16 నుంచి డిసెంబర్ 28 వరకు: రూ.500 ఆలస్య రుసుముతో

జిల్లాలోని అన్ని యాజమాన్యాల పాఠశాలల ప్రధానోపాధ్యాయులు తమ ఐడీ, పాస్‌వర్డ్‌ల ద్వారా బోర్డ్ ఆఫ్ సెకండరీ ఎడ్యుకేషన్ వెబ్‌సైట్‌లో పరీక్ష ఫీజు చెల్లింపు ప్రక్రియను పూర్తి చేయాలని డిఇఓ రమేష్ కుమార్ సూచించారు. పదో తరగతి పబ్లిక్ పరీక్షలకు హాజరయ్యే విద్యార్థులు నిర్ణీత గడువులను గమనించి, చివరి నిమిషంలో ఇబ్బందులు తలెత్తకుండా ముందుగానే పరీక్ష ఫీజు చెల్లింపు ప్రక్రియను పూర్తి చేసుకోవాలని జిల్లా విద్యాశాఖ అధికారి ఏ. రమేష్ కుమార్ సోమవారం విడుదల చేసిన పత్రికా ప్రకటనలో కోరారు.