ప్రతి మహిళా సంఘ సభ్యురాలి ఇంటి వద్ద ఇంకుడు గుంత నిర్మించుకోవాలి

కంది;భూగర్భ జలాలను పెంపొందించేందుకు ప్రతి మహిళా సంఘ సభ్యురాలు తమ ఇంటి ఆవరణలో ఇంకుడు గుంతను తప్పనిసరిగా నిర్మించుకోవాలని సెర్ప్ అసిస్టెంట్ ప్రాజెక్టు మేనేజర్ (ఏపీఎం) శివలక్ష్మి పిలుపునిచ్చారు. కంది మండలంలోని గ్రామంలో మహిళా సంఘాల సభ్యులతో మాట్లాడుతూ వర్షపు నీటిని ఒడిసిపట్టి భూమిలోకి ఇంకేలా చర్యలు తీసుకోవాల్సిన అవసరం ఉందని ఆమె వివరించారు.ప్రస్తుతం భూగర్భ జలాలు అడుగంటుతున్న నేపథ్యంలో వర్షపు నీటిని వృథా చేయకుండా సంరక్షించుకోవాలని సూచించారు. ఇంటి ఆవరణలో, వీధి కుళాయిల వద్ద, ఇంటి పైకప్పు నుంచి వచ్చే వర్షపు నీటిని ఇంకుడు గుంతల్లోకి మళ్లించడం ద్వారా భూగర్భ జలాల మట్టం పెరిగే అవకాశం ఉందన్నారు. తద్వారా భవిష్యత్తులో తాగునీటి కొరతను కొంతవరకు నివారించవచ్చని తెలిపారు.మహిళా సంఘాల సభ్యులు ఈ కార్యక్రమంలో చురుకుగా పాల్గొని, ప్రతి ఇంటి వద్ద ఇంకుడు గుంతల నిర్మాణంపై అవగాహన కల్పించాలని కోరారు. ఒకరిని చూసి మరొకరు ముందుకు వచ్చి ఇంకుడు గుంతలు నిర్మించుకునేలా ప్రోత్సహించాలని సూచించారు. ఇంకుడు గుంతల నిర్మాణానికి ప్రభుత్వం నుంచి అందే సహకారాన్ని సభ్యులు వినియోగించుకోవాలని ఆమె పేర్కొన్నారు.వర్షపు నీటి సంరక్షణ ప్రతి ఒక్కరి బాధ్యత అని, భూగర్భ జలాల పరిరక్షణకు ప్రతి కుటుంబం కృషి చేయాలని ఏపీఎం శివలక్ష్మి కోరారు.