నిబంధనలకు విరుద్ధంగా పెట్రోల్ బంక్ నిర్మిస్తున్నారని కలెక్టర్ కు ఫిర్యాదు

సూర్ కోరుట్ల: జగిత్యాల జిల్లా కోరుట్లలోని కోర్టు భవనానికి సుమారు 40 మీటర్ల దూరంలో నూతనంగా పెట్రోల్ బంక్ ఏర్పాటు చేసేందుకు నిర్మాణ పనులు చేపడుతున్న నేపథ్యంలో, ప్రజల భద్రతపై ఆందోళన వ్యక్తమవుతోంది. ఈ నిర్మాణానికి సంబంధించి అనుమతులు, భద్రతా నిబంధనలను సమగ్రంగా పరిశీలించి తగిన చర్యలు తీసుకోవాలని కోరుతూ కోరుట్ల పట్టణ ప్రజల తరఫున జిల్లా కలెక్టర్‌కు వినతిపత్రం సమర్పించారు. కోర్టుకు న్యాయమూర్తులు, న్యాయవాదులు, కక్షిదారులు, సాక్షులు, ప్రజలు నిత్యం రాకపోకలు సాగిస్తుంటారని, ఇలాంటి కీలకమైన ప్రదేశానికి సమీపంలో పెట్రోల్ బంక్ ఏర్పాటు చేయడం వల్ల అగ్నిప్రమాదాల నివారణ, ప్రజల భద్రతకు సంబంధించిన అంశాలను అధికారులు క్షుణ్ణంగా పరిశీలించాలని వినతిపత్రంలో పేర్కొన్నారు.
పెట్రోలియం నిబంధనలు–2002, భద్రతా ప్రమాణాల ప్రకారం పెట్రోల్ బంక్ ఏర్పాటుకు అవసరమైన అనుమతులు పొందారా లేదా పరిశీలించాలని కోరారు.