నగరంపల్లి లో ఘనంగా సద్దుల బతుకమ్మ వేడుకలు

గణపురం,  మేజర్ న్యూస్, గణపురం మండలం నగరంపల్లి గ్రామంలో సద్దుల బతుకమ్మ వేడుకలు ఆదివారం ఘనంగా నిర్వహించారు. గ్రామ సర్పంచ్‌ కొడారి హైమావతి–ధనుంజయ్‌ యాదవ్‌ పర్యవేక్షణలో మహిళలకు ఎలాంటి ఇబ్బందులు కలగకుండా ప్రత్యేక ఏర్పాట్లు చేశారు. ఈ సందర్భంగా మహిళలు సంప్రదాయ దుస్తులు ధరించి, రంగురంగుల పూలతో అందంగా అలంకరించిన బతుకమ్మలను తీసుకొచ్చారు. గ్రామంలోని మహిళలు పెద్ద సంఖ్యలో ఒకచోట చేరి బతుకమ్మలను మధ్యలో ఉంచి సంప్రదాయ పాటలు పాడుతూ ఆటపాటలతో సందడి చేశారు. మహిళల కోలాటాలు, బతుకమ్మ పాటలు వేడుకలకు ప్రత్యేక ఆకర్షణగా నిలిచాయి. చిన్నారులు, యువతులు, మహిళలు ఉత్సాహంగా పాల్గొని తెలంగాణ సంస్కృతి, సంప్రదాయాల వైభవాన్ని చాటిచెప్పారు. పండుగ ప్రాంగణాన్ని విద్యుత్‌ దీపాలతో అలంకరించడంతో వేడుకలకు మరింత శోభ చేకూరింది. బతుకమ్మ నిమజ్జనం సందర్భంగా ఎలాంటి అవాంఛనీయ ఘటనలు చోటుచేసుకోకుండా గణపురం ఎస్‌ఐ బొరగల అశోక్‌ ఆధ్వర్యంలో పోలీసు బందోబస్తు ఏర్పాటు చేశారు. మహిళలు భక్తిశ్రద్ధలతో, ఆనందోత్సాహాల మధ్య సద్దుల బతుకమ్మ వేడుకలను జరుపుకున్నారు.

రిపోర్టర్ ;ఎల్లయ్య, గణపురం, జయశంకర్ భూపాలపల్లి జిల్లా