telangana
ముగిసిన రాష్ట్రస్థాయి మహిళా క్రికెట్ పోటీలు - బహుమతులు అందజేసిన "బండి" , " కవ్వంపల్లి"
సూర్య తిమ్మాపూర్ : కరీంనగర్ నగర పాలక సంస్థ పరిధిలోని అలుగునూర్ స్టేడియంలో హైదరాబాద్ క్రికెట్ అసోసియేషన్ (హెచ్సీఏ) ఆధ్వర్యంలో తెలంగాణ రాష్ట్ర మహిళా క్రికెట్ అభివృద్ధి టోర్నమెంట్ పేరిట నిర్వహించిన రాష్ట్రస్థాయి మహిళా క్రికెట్ పోటీలు శనివారం ఘనంగా ముగిశాయి. ముగింపు కార్యక్రమానికి ముఖ్య అతిథులుగా కేంద్ర హోంశాఖ సహాయ మంత్రి బండి సంజయ్ కుమార్, మానకొండూర్ ఎమ్మెల్యే, టీపీసీసీ ఎస్సీ సెల్ చైర్మన్ డాక్టర్ కవ్వంపల్లి సత్యనారాయణ హాజరయ్యారు. ఈ సందర్భంగా పోటీల్లో ప్రతిభ కనబరిచి విజయం సాధించిన జట్లకు, క్రీడాకారిణులకు వారు బహుమతులు అందజేశారు.ఈ సందర్భంగా వారు మాట్లాడుతూ మహిళలు, ముఖ్యంగా ఆడపిల్లలు అన్ని రంగాల్లోనూ అద్భుత ప్రతిభ కనబరుస్తూ దేశానికి గర్వకారణంగా నిలుస్తున్నారని కొనియాడారు. క్రీడల్లో మహిళలు మరింతగా రాణించేందుకు తగిన అవకాశాలు, ప్రోత్సాహం కల్పించాల్సిన అవసరం ఉందన్నారు. గ్రామీణ ప్రాంతాల్లోని ప్రతిభావంతులైన క్రీడాకారిణులను వెలుగులోకి తీసుకువచ్చేందుకు హెచ్సీఏ ఇలాంటి రాష్ట్రస్థాయి టోర్నమెంట్లు నిర్వహించడం అభినందనీయమని పేర్కొన్నారు. ఈ టోర్నమెంట్ ద్వారా జిల్లాల స్థాయిలోని ప్రతిభావంతులైన మహిళా క్రికెటర్లను గుర్తించి, వారిని భవిష్యత్తులో రాష్ట్ర, జాతీయ స్థాయి పోటీలకు సిద్ధం చేయాలన్నారు.ఈ కార్యక్రమంలో హెచ్సీఏ ప్రతినిధులు, స్థానిక ప్రజాప్రతినిధులు, నాయకులు, క్రీడాభిమానులు, క్రీడాకారిణులు తదితరులు పాల్గొన్నారు. అల్గునూరు లోని వెలిచాల జగపతి రావు మెమోరియల్ క్రికెట్ గ్రౌండ్ లో ఈనెల 11 నుంచి 21వ జరిగిన ఈ టోర్నమెంట్ లో 120 మంది ప్రతిభావంతులైన మహిళా క్రికెటర్ల తో కూడిన 8 జట్లు పాల్గొన్నాయి