బీహార్ అభివృద్ధికి భారీ ఊతం
సూర్య జాతీయ డెస్క్: బీహార్లోని వైశాలి జిల్లాలో సుమారు రూ. 34,000 కోట్ల విలువైన 227 మౌలిక సదుపాయాలు మరియు అభివృద్ధి ప్రాజెక్టులకు ప్రధానమంత్రి నరేంద్ర మోదీ శనివారం శ్రీకారం చుట్టారు. గంగా నదిపై నిర్మించిన ప్రతిష్టాత్మక 'నితీష్ సేతు' సహా పలు కీలక రహదారి ప్రాజెక్టులను ప్రధాని జాతికి అంకితం చేశారు. జాతీయ రహదారి 19లోని ఔరంగాబాద్-చర్దాహా విభాగం ఆరు వరుసల విస్తరణ, ఎన్హెచ్-227ఎఫ్లోని చోర్మా-బైర్గానియా విభాగం, ఎన్హెచ్-327లోని ఉమాగావ్-సహర్సా విభాగం రహదారులను ఈ సందర్భంగా ప్రారంభించారు. ఈ రహదారి ప్రాజెక్టులతో రాష్ట్రవ్యాప్తంగా రవాణా సౌకర్యాలు మెరుగుపడి, వాణిజ్య కార్యకలాపాలు మరింత వేగవంతం కానున్నాయి.
ఇంధన, జలవనరుల రంగాలలో కూడా ప్రధాని మోదీ పలు కీలక ప్రాజెక్టులను ప్రారంభించారు. 1,320 మెగావాట్ల బక్సర్ థర్మల్ పవర్ ప్రాజెక్టులోని 660 మెగావాట్ల రెండవ యూనిట్తో పాటు ఇంధన శాఖ ఆధ్వర్యంలో నిర్మించిన విద్యుత్ పంపిణీ, ప్రసార మౌలిక సదుపాయాలను ఆయన ప్రారంభించారు. నవాడాలోని ఫుల్వారియా డ్యామ్ వద్ద ఏర్పాటు చేసిన ఫ్లోటింగ్ సోలార్ ప్రాజెక్టు, కహల్గావ్లో మురుగునీటి పారుదల వ్యవస్థ, కాలువలు, కట్టల పునరుద్ధరణ పనులను కూడా జాతికి అంకితం చేశారు. వీటితో పాటు విద్యా సంస్థలు, గురుకుల పాఠశాలలు, ఆరోగ్య సేవలు, వ్యవసాయం, క్రీడలు, ప్రజా పరిపాలనకు సంబంధించిన భవనాలను ప్రధాని ప్రారంభించడం ద్వారా సాగునీటి వసతి, పట్టణ సేవలకు కొత్త బలం చేకూరింది.
భవిష్యత్ అవసరాలను దృష్టిలో ఉంచుకుని పలు భారీ ప్రాజెక్టులకు ప్రధానమంత్రి శంకుస్థాపన చేశారు. రూ. 3,800 కోట్లకు పైగా వ్యయంతో నిర్మించనున్న ఎన్హెచ్-139డబ్ల్యూలోని సాహెబ్గంజ్-అరేరాజ్-బెట్టియా నాలుగు వరుసల రహదారి, సుమారు రూ. 3,350 కోట్ల అంచనా వ్యయంతో పిర్పైంటి సూపర్ థర్మల్ పవర్ ప్రాజెక్టు విద్యుత్ తరలింపు వ్యవస్థ పనులకు ఆయన భూమిపూజ చేశారు. బెగుసరాయ్, బిహార్షరీఫ్, పూర్ణియా, హాజీపూర్, మోతీహారి, దానాపూర్, ఖగారియా, సమస్తిపూర్, బోధ్గయా, సీతామర్హి, సహర్సా సహా పలు పట్టణ ప్రాంతాలలో తాగునీరు, మురుగునీటి పారుదల ప్రాజెక్టులకు శంకుస్థాపన చేశారు.
కాలువల ఆధునీకరణ, డాక్టర్ భీమ్రావ్ అంబేద్కర్ గురుకుల పాఠశాలలు, ఐఐటీ పాట్నా రీసెర్చ్ పార్క్, ఇంజనీరింగ్, పాలిటెక్నిక్ సంస్థలు, అత్యవసర స్పందన మౌలిక సదుపాయాలు, పోలీస్ డేటా సెంటర్ వంటి ఆధునిక ప్రాజెక్టులకు కూడా శంకుస్థాపన జరిగింది. రాష్ట్రంలో కాలుష్య రహిత ప్రజా రవాణాను ప్రోత్సహించేందుకు 100 పీఎం ఈ-బస్సులను ప్రధాని మోదీ జెండా ఊపి ప్రారంభించారు. అలాగే ప్రధానమంత్రి ఆవాస్ యోజన అర్బన్ పథకం కింద 26,900 మందికి పైగా లబ్ధిదారులకు గృహ ప్రవేశ కార్యక్రమం నిర్వహించడం పట్టణ కుటుంబాల సొంతింటి కలను సాకారం చేసింది.