వైశాలిలో నితీష్ సేతు వంతెన ప్రారంభించిన ప్రధాని మోదీ
సూర్య జాతీయ డెస్క్: బీహార్లోని వైశాలి జిల్లాలో గంగా నదిపై నిర్మించిన ఆరు వరుసల 'నితీష్ సేతు' వంతెనను ప్రధానమంత్రి నరేంద్ర మోదీ శనివారం లాంఛనంగా ప్రారంభించారు. మాజీ ముఖ్యమంత్రి నితీష్ కుమార్ పేరుతో నామకరణం చేసిన ఈ వంతెన ప్రారంభోత్సవ అనంతరం ప్రధాని మోదీ కొద్దిసేపు వంతెనపై నడిచారు. ఈ కార్యక్రమంలో బీహార్ గవర్నర్ లెఫ్టినెంట్ జనరల్ సయ్యద్ అతా హస్నైన్, ముఖ్యమంత్రి సామ్రాట్ చౌదరి, కేంద్ర మంత్రి చిరాగ్ పాశ్వాన్, ఉప ముఖ్యమంత్రి విజయ్ కుమార్ చౌదరితో పాటు పలువురు ప్రముఖులు పాల్గొన్నారు.
సుమారు రూ. 4,280 కోట్ల వ్యయంతో ఎక్స్ట్రాడోస్డ్ కేబుల్-స్టేడ్ తరహాలో నిర్మించిన ఈ ప్రాజెక్టు మొత్తం 19.7 కిలోమీటర్ల పొడవు ఉంది. పాట్నా జిల్లాలోని ఎన్హెచ్-22పై ఉన్న కచ్చి దర్గాను, వైశాలి జిల్లాలోని ఎన్హెచ్-322పై ఉన్న బిదుపూర్ను ఇది కలుపుతుంది. ఇందులో సుమారు 9.76 కిలోమీటర్ల ప్రధాన వంతెన, 10 కిలోమీటర్ల అప్రోచ్ రోడ్లు ఉన్నాయని అధికారులు వెల్లడించారు.
నితీష్ సేతు అందుబాటులోకి రావడంతో ఉత్తర, దక్షిణ బీహార్ మధ్య ప్రయాణ సమయం గణనీయంగా తగ్గనుంది. పాట్నా, హాజీపూర్లను కలిపే 40 ఏళ్లకు పైబడిన మహాత్మా గాంధీ సేతు అలాగే జేపీ సేతుపై ట్రాఫిక్ రద్దీ బాగా తగ్గుతుందని అధికారులు అంచనా వేస్తున్నారు. ముఖ్యంగా రాఘోపూర్ దియారా ప్రాంత వాసులకు పాట్నాకు చేరుకోవడం సులభమై, వైద్యం, విద్య వంటి కీలక సేవలకు మెరుగైన సౌకర్యం లభిస్తుంది.
బిదుపూర్-కచ్చి దర్గా కారిడార్ పర్యాటక, లాజిస్టిక్స్ రంగంలో కీలక కేంద్రంగా ఎదిగే అవకాశాలు ఉన్నాయని ప్రభుత్వం విశ్వసిస్తోంది. వ్యవసాయ ఉత్పత్తులు, పారిశ్రామిక సరకుల రవాణా వేగవంతమై మార్కెట్లకు సులభంగా చేరుకోవడం వల్ల ప్రాంతీయ వాణిజ్యం, ఆర్థిక పురోగతికి బలం చేకూరుతుందని అధికారులు తెలిపారు. వైశాలిలోని జాఫర్పట్టి పారిశ్రామిక ప్రాంతంలో నిర్వహించిన కార్యక్రమంలో ప్రధాని మోదీ సుమారు రూ. 34,000 కోట్ల విలువైన 227 అభివృద్ధి ప్రాజెక్టులను కూడా ప్రారంభించారు.