సూర్య, జన్నారం : యోగాతో ఆరోగ్యకరమైన జీవనం, మానసిక ప్రశాంతత, వ్యక్తిత్వ వికాసానికి పెద్దగా దోహదపడుతుందని బ్రహ్మ జ్ఞాన భారత సత్య సంస్థాపకులు గోకులం నాయకపల్లి యోగ పీఠం శంకరాచార్యులు అన్నారు. శనివారం జన్నారం మండల కేంద్రంలో గల జ్యోతి గార్డెన్లో జరిగిన బ్రహ్మ జ్ఞాన యోగ విద్య సంకల్ప సమాలోచన వేదిక ఆధ్వర్యంలో జాతీయస్థాయి రౌండ్ టేబుల్ సమావేశం నిర్వహించారు. ఈ సందర్భంగా రాఘవేంద్ర లిటిల్ హాన్స్ విద్యార్థులచే యోగ ఆసనాలు చేయించారు. అనంతరం శంకరాచార్యులు మాట్లాడుతూ నేటి సమాజంలో చిన్న వయసు నుంచే అనేకమంది మానసిక ఒత్తిళ్లు, జీవనశైలి సంబంధిత సమస్యలను ఎదుర్కొంటున్నారని, వాటిని అధిగమించేందుకు యోగ, ధ్యానం ఎంతగానో ఉపయోగపడతాయని అన్నారు. విద్యావ్యవస్థలో యోగ అమలు చేస్తే ఆరోగ్యవంతమైన క్రమశిక్షణ కలిగిన సంస్కారవంతమైన భవిష్యత్తు తరాన్ని తీర్చిదిద్దవచ్చన్నారు. యోగాను ప్రజల్లోకి విస్తృతంగా తీసుకెళ్లడమే మహా సంకల్పం ప్రధాన లక్ష్యమని అన్నారు. జ్ఞానానందగిరి మహారాజ్, ఆదిత్య చిల్డ్రన్ హాస్పిటల్ డైరెక్టర్ మగ్గిడి తిరుపతి సారథ్యంలో ఈ కార్యక్రమాన్ని నిర్వహించారు. ఈ యోగా కార్యక్రమానికి మాజీ జడ్పిటిసి ఎర్ర చంద్రశేఖర్, స్థానిక ప్రజా ప్రతినిధులు, వైద్యులు, పలువురు ఉపాధ్యాయులు అధిక సంఖ్యలో పాల్గొన్నారు.