వైల్డ్బెర్రీస్ సీఈఓ పదవి నుంచి తట్యానా కిమ్ వైదొలిగారు
సూర్య అంతర్జాతీయ డెస్క్: రష్యాలోని అతిపెద్ద ఆన్లైన్ రిటైలర్ సంస్థ వైల్డ్బెర్రీస్ సీఈఓ పదవి నుంచి తట్యానా కిమ్ వైదొలిగినట్లు రష్యా మీడియా శనివారం వెల్లడించింది. యూరోపియన్ యూనియన్ ఆమెపై ఆంక్షలు విధించిన కొన్ని రోజులకే ఈ పరిణామం చోటుచేసుకోవడం ప్రాధాన్యత సంతరించుకుంది. నూతన సీఈఓగా అలెక్సీ కులికోవ్ను నియమించినట్లు కార్పొరేట్ రిజిస్ట్రీ వివరాలను ఉటంకిస్తూ రష్యా వార్తా సంస్థలు తెలిపాయి. ఈ పరిణామంపై వైల్డ్బెర్రీస్ సంస్థ నుంచి తక్షణ స్పందన వెలువడలేదు.
నవంబరు 16న యూరోపియన్ యూనియన్ తన ఆంక్షల జాబితాలో తట్యానా కిమ్ పేరును చేర్చడంతో ఆమెపై ఈయూ పరిధిలో ఆస్తుల స్తంభనతో పాటు ప్రయాణ, లావాదేవీల నిషేధాలు అమల్లోకి వచ్చాయి. రష్యాలో అతిపెద్ద పన్ను చెల్లింపుదారులలో వైల్డ్బెర్రీస్ ఒకటిగా ఉండటంతో పాటు సైనిక, ద్వంద్వ వినియోగ వస్తువుల విక్రయాలను సులభతరం చేస్తూ రష్యా సైన్యానికి సరఫరా నెట్వర్క్గా పనిచేస్తోందనే ఆరోపణలపై ఈయూ ఆమెను లక్ష్యంగా చేసుకున్నట్లు పేర్కొంది. అయితే రష్యా సైన్యానికి వైల్డ్బెర్రీస్ ఎలాంటి సరఫరాలు చేయడం లేదని సంస్థతో పాటు క్రెమ్లిన్ వర్గాలు ఖండించాయి.
తట్యానా కిమ్పై విధించిన ఈయూ ఆంక్షల వల్ల తమ కార్యకలాపాలపై ఎలాంటి ప్రభావం ఉండదని వైల్డ్బెర్రీస్ గతంలో స్పష్టం చేసింది. యూరోపియన్ యూనియన్లో తమకు ఎలాంటి ఆస్తులు లేవని, అక్కడ వ్యాపార కార్యకలాపాలు నిర్వహించడం లేదని సంస్థ తెలిపింది. వైల్డ్బెర్రీస్తో పాటు గ్రూప్లోని ఇతర సంస్థలు యథావిధిగా తమ కార్యకలాపాలను కొనసాగిస్తాయని వెల్లడించింది.
రష్యా ఈ-కామర్స్ రంగంలో కీలక శక్తిగా ఎదిగిన వైల్డ్బెర్రీస్ నాయకత్వంలో వచ్చిన ఈ మార్పు అంతర్జాతీయ వాణిజ్య, ఆర్థిక వర్గాల్లో ఆసక్తి రేపుతోంది. ఆంక్షల నేపథ్యంలో కొత్త సీఈఓ అలెక్సీ కులికోవ్ సారథ్యంలో సంస్థ వ్యాపార వ్యూహాలు ఎలా ఉండబోతున్నాయన్న అంశంపై మార్కెట్ వర్గాలు దృష్టి సారించాయి.