మాంటె డీ పాస్కి కొనుగోలుకు ఇంటెసా శాన్పాలో నగదు, షేర్ ఆఫర్
సూర్య అంతర్జాతీయ డెస్క్: ఇటలీ బ్యాంకింగ్ దిగ్గజం ఇంటెసా శాన్పాలో, బాంకా మాంటె డీ పాస్కి డి సియెనా షేర్లన్నింటినీ కొనుగోలు చేసేందుకు స్వచ్ఛంద నగదు, షేర్ మార్పిడి ఆఫర్ను ప్రారంభించినట్లు మాంటె డీ పాస్కి శనివారం ఒక ప్రకటనలో వెల్లడించింది. ఈ ఆఫర్ విలువ సుమారు 34.5 బిలియన్ యూరోలుగా అంచనా వేయబడింది. ఈ ఒప్పందానికి షరతులు లేని ఆమోదం తెలిపే దిశగా ఇటలీ ప్రభుత్వం మొగ్గు చూపుతున్నట్లు సమాచారం.
అక్టోబరు 30న వ్యూహాత్మక జాతీయ ప్రయోజనాల నిబంధనల కింద ఇంటెసా శాన్పాలో ప్రభుత్వానికి సమాచారం అందించగా, రాబోయే కొద్ది వారాల్లో అధికారిక నిర్ణయం వెలువడే అవకాశం ఉంది. ఇప్పటికే యూరోపియన్ సెంట్రల్ బ్యాంక్ సహా సంబంధిత ఆర్థిక నియంత్రణ సంస్థల నుంచి ఆమోదాలు లభించాయి. నవంబరు 24 నుంచి 2027 జనవరి 22 వరకు ఆఫర్ స్వీకరణ ప్రక్రియ కొనసాగనుంది. ప్రతి ఎంఎపీఎస్ షేరుకు 1.25 యూరోల నగదుతో పాటు కొత్తగా జారీ చేసే 1.664 ఇంటెసా షేర్లను ఆఫర్గా ప్రకటించారు. తొలుత ప్రకటించిన నిబంధనలతో పోలిస్తే పరిహారాన్ని పెంచడంతో పాటు సియెనా, టస్కానీ ప్రాంతాల పారిశ్రామిక, ఉపాధి, సంస్థాగత పాత్రకు మరింత ప్రాధాన్యత ఇచ్చినట్లు ఎంఎపీఎస్ బోర్డు పేర్కొంది.
ఈ కొనుగోలు పూర్తయితే ఇటలీ బ్యాంకింగ్ రంగంలో సమీకరణలు వేగవంతమై, యూనిక్రెడిట్తో పోటీలో ఇంటెసా మరింత బలోపేతం అవుతుంది. అలాగే 2.7 కోట్లకు పైగా ఖాతాదారులకు సేవలు అందించే భారీ బ్యాంకింగ్ సమూహంగా ఇది రూపుదిద్దుకునే అవకాశం ఉంది. ఎంఎపీఎస్, బాంకో బీపీఎం కేంద్రంగా మూడో ప్రధాన దేశీయ బ్యాంకింగ్ గ్రూప్ను ఏర్పాటు చేయాలన్న ఇటలీ ప్రభుత్వ ప్రయత్నాలు గతంలో ఫలించలేదు.
అక్టోబరులో పోటీ పునర్వ్యవస్థీకరణ ప్రణాళికలను ఎంఎపీఎస్ వాటాదారులు తిరస్కరించిన తర్వాత ఇంటెసా ఆఫర్కు మార్గం సుగమమైంది. కనీసం 66.67 శాతం వాటా సమీకరణ, మిగిలిన నియంత్రణ అనుమతులకు లోబడి ఈ లావాదేవీ ముందుకు సాగనుంది. ఇటలీ బ్యాంకింగ్ రంగంలో ఈ భారీ విలీన ఆఫర్పై అంతర్జాతీయ ఆర్థిక వర్గాల్లో ఆసక్తి నెలకొంది.