కబడ్డీలో ఉత్తమ ప్రతిభ కనబరిచిన క్రీడాకారులు..! హుస్నాబాద్ ప్రాంత కబడ్డీ క్రీడాకారులకు ఘన సన్మానం..!
హుస్నాబాద్ ; హుస్నాబాద్ నియోజకవర్గానికి చెందిన కబడ్డీ క్రీడాకారులు ఉమ్మడి మెదక్ జిల్లాకు ప్రాతినిధ్యం వహిస్తున్న సందర్భంగా వారిని హుస్నాబాద్ ప్రైవేట్ వ్యాయామ ఉపాధ్యాయుల అసోసియేషన్ ఆధ్వర్యంలో ఘనంగా సత్కరించడం జరిగింది.కబడ్డీ క్రీడలో ప్రతిభ కనబరిచి జిల్లా స్థాయిలో ఎంపికై, ఉమ్మడి మెదక్ జిల్లాకు ప్రాతినిధ్యం వహిస్తున్న క్రీడాకారులు హుస్నాబాద్ ప్రాంతానికి గర్వకారణమని ఈ సందర్భంగా నిర్వాహకులు అన్నారు. గ్రామీణ ప్రాంతాల నుంచి వచ్చిన క్రీడాకారులు ఇంతటి స్థాయికి ఎదగడం వెనుక వారి క్రమశిక్షణ, కఠోర సాధన, వ్యాయామ ఉపాధ్యాయుల ప్రోత్సాహం ఉందని కొనియాడారు.
క్రీడాకారులను శాలువాలతో సత్కరించి, జ్ఞాపికలు అందజేసి అభినందించారు. రాబోయే పోటీల్లో మరింత మెరుగైన ప్రదర్శన కనబరచి రాష్ట్ర, జాతీయ స్థాయిలో రాణించాలని ఆకాంక్షించారు. క్రీడల వల్ల శారీరక, మానసిక దృఢత్వంతో పాటు జట్టు స్ఫూర్తి, నాయకత్వ లక్షణాలు అలవడతాయని, విద్యార్థులు చదువుతో పాటు క్రీడలకు కూడా ప్రాధాన్యం ఇవ్వాలని సూచించారు.ఈ కార్యక్రమంలో స్థానిక సెంట్ జోసెఫ్ ప్రిన్సిపాల్ విజయేంద్ర రెడ్డి, ప్రైవేట్ వ్యాయామ ఉపాధ్యాయుల అసోసియేషన్ అధ్యక్షుడు శ్రీనివాస్, ఉపాధ్యక్షుడు అరవింద్, సెక్రటరీ రాజారెడ్డి, ట్రెజరర్ సంపత్, జాయింట్ సెక్రటరీ లక్ష్మణ్ మరియు ఈసీ మెంబర్లు అజయ్, స్రవంతి, కవిత, మాధవి, లావణ్య, కళావతి పాల్గొన్నారు.