మేనిఫెస్టో హామీలకు మూడేళ్ల మంగళం! సంక్షేమ పథకాల అమలులో కాంగ్రెస్ ప్రభుత్వం విఫలం
కొండాపూర్ ; కాంగ్రెస్ ప్రభుత్వం అధికారంలోకి వచ్చి మూడేళ్లు కావస్తున్నా ఎన్నికల మేనిఫెస్టోలో ఇచ్చిన హామీలను పూర్తిస్థాయిలో అమలు చేయలేదని బీఆర్ఎస్ మండల సోషల్ మీడియా ఇన్చార్జి శేఖర్ విమర్శించారు. ప్రతిపక్షాలను విమర్శించడం మానేసి ప్రజలకు ఇచ్చిన హామీల అమలుపై దృష్టి పెట్టాలని సూచించారు.గతంలో వృద్ధులకు రూ.2,016, దివ్యాంగులకు రూ.3,016 పింఛన్లు అందేవని, అధికారంలోకి వస్తే పింఛన్లు రూ.4 వేలకు పెంచుతామని చెప్పి ఇప్పటికీ అమలు చేయలేదన్నారు. మహిళలకు నెలకు రూ.2,500, రూ.500కే గ్యాస్ సిలిండర్, రైతులకు ఎకరాకు ఏడాదికి రూ.15 వేల రైతు భరోసా, వ్యవసాయ కూలీలకు రూ.12 వేలు, వరికి క్వింటాల్కు రూ.500 బోనస్ వంటి హామీలను పూర్తిస్థాయిలో నెరవేర్చలేదని అన్నారు.రాజీవ్ యువ వికాసం కింద యువతకు సబ్సిడీ రుణాలు, దళిత బంధు, నిరుద్యోగులకు ఉపాధి అవకాశాలు కల్పించడంలో రైతులకు రైతు భరోసా పూర్తిస్థాయిలో అందడం లేదని, ధాన్యం కొనుగోళ్లలో జాప్యం, వ్యవసాయ విద్యుత్ సమస్యలతో రైతులు ఇబ్బందులు పడుతున్నారని పేర్కొన్నారు.ఇప్పటికైనా ఎన్నికల హామీలన్నీ అమలు చేసి పేదలకు సంక్షేమ పథకాలు అందించాలని శేఖర్ డిమాండ్ చేశారు. గత బీఆర్ఎస్ ప్రభుత్వ హయాంలో కేసీఆర్ నాయకత్వంలో తెలంగాణ సంక్షేమం, అభివృద్ధిలో ముందంజలో ఉందని, మళ్లీ కేసీఆర్ ప్రభుత్వం వస్తేనే రాష్ట్రం అభివృద్ధి పథంలో పయనిస్తుందని అన్నారు.