ఎల్నినో ప్రభావంతో రానున్న నీటి, విద్యుత్ సమస్యలపై విద్యార్థుల అవగాహన సదస్సు...
దుబ్బాక ..దుబ్బాక మండలంలోని మాస్టర్ మైండ్ విద్యాలయంలో ఎల్నినో ప్రభావంతో భవిష్యత్తులో ఎదురయ్యే నీటి కొరత, విద్యుత్ సమస్యలపై విద్యార్థుల ద్వారా అవగాహన సదస్సు నిర్వహించారు.
ఈ సందర్భంగా పాఠశాల విద్యార్థులు వివిధ వేషధారణలతో సులభంగా అర్థమయ్యే రీతిలో రాబోయే కాలంలో ఎదురయ్యే సమస్యలను వివరించారు. నీటి కొరత, విద్యుత్ వినియోగంపై ప్రజలకు అవగాహన కల్పిస్తూ తీసుకోవాల్సిన ముందస్తు జాగ్రత్తలను తెలియజేశారు.ముఖ్యంగా రాబోయే రోజుల్లో వాతావరణ మార్పుల ప్రభావంతో వ్యవసాయ రంగం అనేక సవాళ్లను ఎదుర్కొనే అవకాశం ఉందని, రైతులకు సాగు మరింత కష్టతరంగా మారవచ్చని విద్యార్థులు వివరించారు. ప్రతి ఒక్కరూ తమ రోజువారీ జీవితంలో నీటిని పొదుపుగా వినియోగించాలని, అవసరం లేకుండా నీటిని వృథా చేయరాదని సూచించారు. అలాగే విద్యుత్ను కూడా అవసరమైనప్పుడే వినియోగిస్తూ పొదుపు చర్యలు పాటించాలని సందేశమిచ్చారు.
విద్యార్థులే స్వయంగా వివిధ పాత్రలు పోషిస్తూ సమాజానికి ఉపయోగపడే సందేశాన్ని అందించడం కార్యక్రమంలో ప్రత్యేక ఆకర్షణగా నిలిచింది. ముఖ్యంగా ఎనిమిదో తరగతి విద్యార్థులు తమ ప్రదర్శనతో అందరి దృష్టిని ఆకర్షించారు.
చిన్న వయసులోనే పర్యావరణ పరిరక్షణ, నీటి పొదుపు, విద్యుత్ ఆదాపై విద్యార్థుల్లో అవగాహన కల్పించే ఈ కార్యక్రమం అభినందనీయంగా నిలిచింది.