telangana
మేడ్చల్-మల్కాజిగిరి కలెక్టర్‌ను కోర్టులో హాజరుపరచాలని సీపీకి హైకోర్టు ఆదేశం
హైదరాబాద్: మేడ్చల్-మల్కాజిగిరి జిల్లా కలెక్టర్‌పై తెలంగాణ ఉన్నత న్యాయస్థానం తీవ్ర ఆగ్రహం వ్యక్తం చేసింది. కోర్టు విచారణకు హాజరుకాకపోవడాన్ని తప్పుబడుతూ, కలెక్టర్‌ను గురువారం ఉదయం ప్రత్యక్షంగా తమ ఎదుట హాజరుపరచాలని మల్కాజిగిరి పోలీస్ కమిషనర్‌ను హైకోర్టు ఆదేశించింది.
ప్రభుత్వ భూమిని అక్రమ ఆక్రమణదారుల నుంచి స్వాధీనం చేసుకోవడంలో కలెక్టర్ తీవ్ర నిర్లక్ష్యం వహించారని కోర్టు మండిపడింది. ఈ మేరకు జస్టిస్ బి.విజయేషన్ రెడ్డి నేతృత్వంలోని ధర్మాసనం విచారణ చేపడుతూ... ప్రభుత్వ ఆస్తుల పరిరక్షణలో బాధ్యతాయుతమైన పదవిలో ఉన్న అధికారులు ఇంత నిర్లక్ష్యంగా వ్యవహరించడంపై అసహనం వ్యక్తం చేసింది. తదుపరి విచారణకు కలెక్టర్ స్వయంగా హాజరై వివరణ ఇవ్వాలని స్పష్టం చేసింది.
