telangana
మహిళల కొనుగోళ్లపై పరిశోధన.. సంతోష్ కుమార్‌కు డాక్టరేట్
ఘట్‌కేసర్, మేజర్ న్యూస్:మహిళల ఆన్‌లైన్ కొనుగోలు ప్రవర్తనపై సమగ్ర పరిశోధన చేసిన వెంకటాపూర్ అనురాగ్ యూనివర్సిటీ పరిశోధక విద్యార్థి సంతోష్ కుమార్ కూర పీహెచ్‌డీ పట్టా పొందారు. అక్టోబర్ 9న నిర్వహించిన తుది వైవా వోస్‌లో తన పరిశోధనను విజయవంతంగా పూర్తి చేశారు. చిన్న వంటగది ఉపకరణాల కొనుగోలులో మహిళల ఆన్‌లైన్ ప్రవర్తనపై ప్రభావం చూపే అంశాలే ఇతివృత్తంగా ఆయన పరిశోధన సాగింది. ఉత్పత్తుల ధర, నాణ్యత, వినియోగ సౌలభ్యం, ఉపయోగకరత, ఆన్‌లైన్ సమీక్షలు మహిళల కొనుగోలు నిర్ణయాలను ఏ విధంగా ప్రభావితం చేస్తున్నాయన్న అంశాలను విశ్లేషించారు.ఈ పరిశోధనకు అనురాగ్ యూనివర్సిటీ స్కూల్ ఆఫ్ మేనేజ్‌మెంట్ అసోసియేట్ ప్రొఫెసర్ డా. జి. మహేందర్ మార్గదర్శకత్వం వహించారు. కర్ణాటకలోని ఎన్‌ఐటీ సూరత్కల్ అసోసియేట్ ప్రొఫెసర్ డా. బిజునా సి. మోహన్ బాహ్య పరీక్షకులుగా వ్యవహరించారు. ఈ సందర్భంగా స్కూల్ ఆఫ్ మేనేజ్‌మెంట్ డీన్ డా. ఉట్ల బాలాజీ, విభాగాధిపతి డా. వి. విష్ణు వందన, పరిశోధన, అభివృద్ధి విభాగం డీన్ ప్రొఫెసర్ సతీష్ కుమారన్, పరీక్షల విభాగం డీన్ ప్రొఫెసర్ ముత్తా రెడ్డి, పరీక్షల నియంత్రణాధికారి డా. సికిందర్ బాబా సంతోష్ కుమార్‌ను అభినందించారు. పరిశోధన మార్గదర్శకుడు డా. జి. మహేందర్‌ను సైతం ప్రశంసించారు.
