క్రిప్టో లాభాలపై 10 శాతం పన్ను...గ్రీస్ పార్లమెంట్ సంచలన చట్టం
సూర్య బిజినెస్ డెస్క్: డిజిటల్ అసెట్స్ రంగానికి సంబంధించి గ్రీస్ ప్రభుత్వం ఒక చరిత్రాత్మక నిర్ణయం తీసుకుంది. క్రిప్టోకరెన్సీ లాభాలపై అధికారికంగా 10 శాతం మూలధన లాభాల పన్నును (Capital Gains Tax) విధిస్తూ రూపొందించిన నూతన బిల్లుకు గ్రీస్ పార్లమెంట్ ఆమోదం తెలిపింది. తద్వారా క్రిప్టో మార్కెట్‌పై సమగ్రమైన మరియు అధికారిక చట్టపరమైన ఫ్రేమ్‌వర్క్‌ను ఏర్పాటు చేసిన దేశాల జాబితాలో గ్రీస్ చేరినట్లు ప్రముఖ అంతర్జాతీయ మీడియా నివేదికలు వెల్లడించాయి.
ఈ నూతన చట్టం ప్రకారం, వ్యక్తులు ఆర్జించే క్రిప్టో లాభాలపై 10 శాతం పన్ను వర్తించనుంది. అయితే చిన్న మదుపర్లకు ఊరటనిచ్చేలా ఏడాదిలో 500 యూరోల (సుమారు 563 డాలర్లు) వరకు వచ్చే క్రిప్టో మూలధన లాభాలను పన్ను నుంచి మినహాయించినట్లు ప్రభుత్వం స్పష్టం చేసింది. కేవలం ట్రేడింగ్ లాభాలపైనే కాకుండా, క్రిప్టో లెండింగ్ (అప్పుగా ఇవ్వడం), లిక్విడిటీ ప్రొవిజనింగ్ మరియు స్టాకింగ్ ద్వారా వచ్చే రాబడులను కూడా వడ్డీ కింద పరిగణించి ఇదే 10 శాతం పన్ను పరిధిలోకి తెచ్చారు.
యూరప్‌లోని వివిధ దేశాల్లో క్రిప్టో ట్యాక్సేషన్ రేట్లు 8 శాతం నుంచి 30 శాతం వరకు భిన్నంగా ఉన్న నేపథ్యంలో, గ్రీస్ ప్రభుత్వం నిర్ణయించిన ఈ 10 శాతం పన్ను మధ్యస్తంగా ఉందని ఆర్థిక నిపుణులు విశ్లేషిస్తున్నారు. అయితే, చాలామంది మదుపర్లు విదేశీ ప్లాట్‌ఫామ్‌లను ఆశ్రయిస్తుండటంతో ఈ కొత్త పన్ను విధానం ద్వారా ప్రభుత్వానికి ఎంతమేర ఆదాయం సమకూరుతుందనేది కచ్చితంగా అంచనా వేయలేమని ఆర్థిక మంత్రిత్వ శాఖ అధికారులు పేర్కొన్నారు. ఏదేమైనా, డిజిటల్ కరెన్సీ లావాదేవీలపై పారదర్శకతను తీసుకురావడానికి గ్రీస్ తీసుకున్న ఈ చర్య యూరోపియన్ మార్కెట్లో తీవ్ర చర్చనీయాంశమైంది.
