లైంగిక వేధింపుల ఫిర్యాదును స్వీకరించని రాజేంద్రనగర్ పోలీసులు : హేమా సుదర్శన్

రంగారెడ్డి : రాజేంద్రనగర్‌లోని ప్రొఫెసర్ జయశంకర్ తెలంగాణ వ్యవసాయ విశ్వవిద్యాలయంలో మహిళా లెక్చరర్ తేజస్విపై జరిగినట్లు ఆరోపణలు ఎదుర్కొంటున్న లైంగిక వేధింపుల ఘటనపై ఆమ్ ఆద్మీ పార్టీ తెలంగాణ రాష్ట్ర అధ్యక్షురాలు హేమా సుదర్శన్ జిల్లోజు తీవ్ర ఆగ్రహం వ్యక్తం చేశారు. బాధితురాలు ఫిర్యాదు చేసేందుకు ప్రయత్నించినా రాజేంద్రనగర్ పోలీసులు స్వీకరించకపోవడం బాధ్యతారాహిత్యానికి నిదర్శనమని విమర్శించారు.

ఈ సందర్భంగా ఆమె మాట్లాడుతూ.. విద్యాసంస్థలో మహిళా లెక్చరర్‌కే రక్షణ లేకపోతే అక్కడ చదువుకుంటున్న విద్యార్థినుల భద్రతకు ఎవరు బాధ్యత వహిస్తారని ప్రశ్నించారు. బాధితురాలి ఫిర్యాదును తక్షణమే స్వీకరించి, ఘటనపై నిష్పక్షపాతంగా విచారణ జరిపించాలని, బాధ్యులపై కఠిన చర్యలు తీసుకోవాలని డిమాండ్ చేశారు.

రాష్ట్రంలో హోంమంత్రి పదవిని భర్తీ చేయకపోవడం వల్ల మహిళల భద్రతపై ప్రభుత్వానికి ఉన్న చిత్తశుద్ధి ప్రశ్నార్థకంగా మారుతోందన్నారు. మహిళలపై వేధింపులు, దాడులు జరిగినప్పుడు ప్రభుత్వం తక్షణమే స్పందించాలని హితవు పలికారు.

ముఖ్యమంత్రి రేవంత్ రెడ్డి వెంటనే ఈ ఘటనపై జోక్యం చేసుకుని సమగ్ర విచారణకు ఆదేశించాలని కోరారు. మహిళా కమిషన్ కూడా ఈ ఘటనను సుమోటోగా పరిగణించి బాధితురాలికి న్యాయం జరిగేలా చర్యలు తీసుకోవాలని విజ్ఞప్తి చేశారు. బాధిత మహిళకు న్యాయం జరిగే వరకు ఆమ్ ఆద్మీ పార్టీ అండగా ఉంటుందని ఆమె స్పష్టం చేశారు.

వడ్ల శ్రీనివాస చారి :  రంగారెడ్డి, మేజర్ న్యూస్