మంత్రి కందుల దుర్గేష్‌ను కలిసిన పి. గన్నవరం జడ్పీటీసీ యడ్ల సుబ్బలక్ష్మి దంపతులు
సూర్య ఏపీ డెస్క్: డాక్టర్ బి.ఆర్. అంబేద్కర్ కోనసీమ జిల్లా పి. గన్నవరం మండలానికి చెందిన యడ్ల సుబ్బలక్ష్మి కూటమి తరఫున జనసేన పార్టీ జడ్పీటీసీ అభ్యర్థిగా పోటీ చేసి ఘన విజయం సాధించారు. ఈ సందర్భంగా ఆమె తన భర్త ఏసు భాస్కరరావుతో కలిసి రాష్ట్ర పర్యాటక, సాంస్కృతిక, సినిమాటోగ్రఫీ శాఖ మంత్రి కందుల దుర్గేష్‌ను మర్యాదపూర్వకంగా కలిశారు.
జడ్పీటీసీ ఎన్నికల్లో విజయం సాధించిన యడ్ల సుబ్బలక్ష్మి దంపతులను మంత్రి కందుల దుర్గేష్ ప్రత్యేకంగా అభినందించి, హృదయపూర్వక శుభాకాంక్షలు తెలిపారు. జనసేన పార్టీలో మహిళలకు సముచిత ప్రాధాన్యత కల్పిస్తూ, రాజకీయాల్లో ప్రజాప్రతినిధులుగా రాణించే అవకాశాలను అందిస్తున్న నేపథ్యంలో యడ్ల సుబ్బలక్ష్మి విజయం ఎంతో ప్రాధాన్యత సంతరించుకుందని ఈ సందర్భంగా పేర్కొన్నారు.
ఈ సందర్భంగా జడ్పీటీసీ యడ్ల సుబ్బలక్ష్మి మాట్లాడుతూ.. కూటమి నాయకులు, కార్యకర్తల సమిష్టి కృషితోనే ఈ విజయం సాధ్యమైందని, ప్రజలు తనపై ఉంచిన నమ్మకాన్ని పూర్తిస్థాయిలో నిలబెట్టుకుంటూ పి. గన్నవరం మండల సమగ్రాభివృద్ధికి శక్తివంచన లేకుండా కృషి చేస్తానని స్పష్టం చేశారు. ఈ కార్యక్రమంలో జనసేన పార్టీ మండల అధ్యక్షుడు సాధనాల శ్రీ వెంకట సత్యనారాయణ, జనసేన యువత అధ్యక్షుడు తాటికాయల వెంకటేష్ తదితర నాయకులు, కార్యకర్తలు పాల్గొన్నారు.
