national
ముంబైలో బాంబు బెదిరింపుల కలకలం..
ముంబై: దేశ ఆర్థిక రాజధాని ముంబైలో బాంబు బెదిరింపు ఈ-మెయిల్స్ తీవ్ర కలకలం రేపాయి. నగరంలోని అత్యంత కీలకమైన ప్రాంతాలతో పాటు బాలీవుడ్ మెగాస్టార్ అమితాబ్ బచ్చన్ నివాసాన్ని బాంబులతో పేల్చివేస్తామంటూ గుర్తుతెలియని దుండగులు బెదిరింపు మెయిల్స్ పంపారు. ఈ మెయిల్‌లో ముంబై మేయర్ కార్యాలయం (BMC హెడ్ క్వార్టర్స్) మరియు ఛత్రపతి శివాజీ మహారాజ్ అంతర్జాతీయ విమానాశ్రయాన్ని కూడా లక్ష్యంగా చేసుకున్నట్లు హెచ్చరించారు.
బెదిరింపు ఈ-మెయిల్ అందిన వెంటనే ముంబై పోలీసు ఉన్నతాధికారులు, భద్రతా ఏజెన్సీలు పూర్తిస్థాయిలో అప్రమత్తమయ్యాయి. ముందుజాగ్రత్త చర్యగా బాంబ్ డిస్పోజల్ స్క్వాడ్ (BDDS), డాగ్ స్క్వాడ్ బృందాలు అమితాబ్ బచ్చన్ నివాసం ‘జల్సా’తో పాటు మేయర్ కార్యాలయం, విమానాశ్రయ పరిసరాల్లో విస్తృత తనిఖీలు చేపట్టాయి. ఎక్కడా ఎలాంటి అనుమానాస్పద వస్తువులు లభించకపోవడంతో అధికారులు ఊపిరి పీల్చుకున్నారు. మరోవైపు, ఈ బెదిరింపు మెయిల్ ఎక్కడి నుంచి వచ్చింది? దీని వెనుక ఎవరున్నారనే కోణంలో ముంబై సైబర్ క్రైమ్ పోలీసులు కేసు నమోదు చేసి ఐపీ (IP) అడ్రస్ ఆధారంగా దర్యాప్తు ముమ్మరం చేశారు.
