తక్కువ నీటితో పండే పంటలు సాగు చేయాలి

సూర్య మాక్లూర్ : మాక్లూర్ మండలం కొత్తపల్లి గ్రామంలో ఖేత్ బచావో అభియాన్ కార్యక్రమంలో భాగంగా రైతులకు వ్యవసాయంపై అవగాహన కార్యక్రమం నిర్వహించారు. ఈ సందర్భంగా భూసార పరిరక్షణ, ఎల్‌నినో ప్రభావం, పంటల సాగులో తీసుకోవాల్సిన జాగ్రత్తలపై రైతులకు వివరించారు.వర్షాభావ పరిస్థితులు, ఎల్‌నినో ప్రభావంతో నీటి కొరత ఏర్పడే అవకాశాలు ఉన్నందున రైతులు అప్రమత్తంగా ఉండాలని సూచించారు. వరి వంటి అధిక నీటి అవసరమయ్యే పంటలకు బదులుగా ఆరుతడి పంటలు, కూరగాయలు తదితర తక్కువ నీటితో సాగు చేయగల పంటలను ఎంచుకోవాలని తెలిపారు. దీనివల్ల పెట్టుబడి నష్టాలను తగ్గించుకోవడంతో పాటు రైతులు ఆర్థికంగా నష్టపోకుండా ఉండే అవకాశం ఉంటుందన్నారు.అలాగే భూసారాన్ని కాపాడేందుకు పంట మార్పిడి విధానాన్ని అవలంబించాలని, రసాయన ఎరువుల వినియోగాన్ని తగ్గించి సేంద్రియ వ్యవసాయం వైపు రైతులు మొగ్గు చూపాలని సూచించారు. భూమి ఆరోగ్యాన్ని కాపాడుకుంటూ నీటి వనరులను పొదుపుగా వినియోగించుకోవాలని అవగాహన కల్పించారు.ఈ కార్యక్రమంలో సర్పంచ్ భరత్,ఉపసర్పంచ్ హన్మండ్ల,మండల వ్యవసాయ అధికారిని పద్మ,కార్యదర్శి సాగర్,వ్యవసాయ విస్తీర్ణ అధికారి నరేష్,రైతులు శ్రీనివాస్,మురళి,సాయిబాబా,గాంధీ,రామ్మోహన్,తదితరులు పాల్గొన్నారు.