మెరుగైన వైద్యానికి రూ.7 లక్షల ఎల్‌ఓసీ అందజేత
మంచాల,మేజర్ న్యూస్: రోడ్డు ప్రమాదంలో తీవ్రంగా గాయపడి హైదరాబాద్‌లోని నిమ్స్ ఆసుపత్రిలో చికిత్స పొందుతున్న చెన్నారెడ్డిగూడ గ్రామానికి చెందిన రత్నావత్ శివ నాయక్‌కు మెరుగైన వైద్యం అందించేందుకు రూ.7 లక్షల ఎల్‌ఓసీ మంజూరైంది. ఇబ్రహీంపట్నం ఎమ్మెల్యే మల్‌రెడ్డి రంగారెడ్డి సహకారంతో మంజూరైన ఎల్‌ఓసీ పత్రాన్ని మంచాల వ్యవసాయ సహకార సంఘం డైరెక్టర్ జెనిగే వెంకటేష్ యాదవ్ గురువారం నిమ్స్ ఆసుపత్రిలో బాధిత కుటుంబ సభ్యులకు అందజేశారు. కొద్ది రోజుల క్రితం రోడ్డు ప్రమాదంలో శివ నాయక్ తలకు తీవ్ర గాయాలయ్యాయి. దీంతో కుటుంబ సభ్యులు నిమ్స్ ఆసుపత్రిలో చేర్పించగా, తలకు శస్త్రచికిత్స చేయాల్సి ఉందని, ఇందుకు భారీగా ఖర్చవుతుందని వైద్యులు తెలిపారు. ఆర్థిక ఇబ్బందులతో సతమతమవుతున్న కుటుంబ సభ్యులు ఈ విషయాన్ని జెనిగే వెంకటేష్ యాదవ్ దృష్టికి తీసుకెళ్లారు. దీంతో ఆయన బాధిత కుటుంబ సభ్యులతో కలిసి ఎమ్మెల్యే మల్‌రెడ్డి రంగారెడ్డిని కలిసి పరిస్థితిని వివరించారు. వెంటనే స్పందించిన ఎమ్మెల్యే రూ.7 లక్షల ఎల్‌ఓసీ మంజూరుకు సహకరించారు. ఈ సందర్భంగా జెనిగే వెంకటేష్ యాదవ్ మాట్లాడుతూ.. పేద ప్రజలకు వైద్య ఖర్చుల విషయంలో కాంగ్రెస్ ప్రభుత్వం అండగా ఉంటుందని తెలిపారు. ఆర్థిక స్థోమత లేక వైద్యం చేయించుకోలేని నిరుపేదలకు ఎల్‌ఓసీ ద్వారా అందే సహాయం ఎంతో ఉపయోగకరమని అన్నారు. పేదలు వైద్యానికి సంబంధించి ఎలాంటి ఇబ్బందులు ఎదుర్కొన్నా అధైర్యపడవద్దని పేర్కొన్నారు. ఈ కార్యక్రమంలో చెన్నారెడ్డిగూడ మాజీ సర్పంచ్ ఆంబోతు కిషన్ నాయక్, వార్డు సభ్యుడు హర్య, రత్నావత్ స్వామి, బాణావత్ శ్రీనివాస్ నాయక్ తదితరులు పాల్గొన్నారు.
ఎర్ర లింగం, మేజర్ న్యూస్, మంచాల, రంగారెడ్డి జిల్లా.
