క్యూర్ పరిధిలో ప్రయాణికులకు టీ జీ ఎస్ ఆర్ టీ సీ సరికొత్త కానుక

హైదరాబాద్, సూర్య ప్రతినిధి :

నగరవాసులకు మరియు నిత్య ప్రయాణికులకు తెలంగాణ రాష్ట్ర రోడ్డు రవాణా సంస్థ (TGSRTC) తీపి కబురు అందించింది. ప్రయాణికుల సేవలను మరింత సులభతరం చేసేందుకు మరియు ఆర్థిక భారాన్ని తగ్గించేందుకు గానూ ఆర్టీసీ యాజమాన్యం ఒక సరికొత్త పథకానికి శ్రీకారం చుట్టింది.

కేవలం రూ.600 లకే వారం రోజుల పాటు అన్ని రకాల బస్సుల్లో అపరిమితంగా ప్రయాణించే వెసులుబాటును కల్పిస్తూ కొత్త 'వీక్లీ పాస్' (Weekly Pass) పథకాన్ని అందుబాటులోకి తీసుకువచ్చింది. గ్రేటర్ హైదరాబాద్ (క్యూర్) పరిధిలో తిరిగే ఏసీ బస్సులతో సహా అన్ని రకాల సిటీ బస్సుల్లో ఈ పాస్ ద్వారా ప్రయాణించవచ్చని అధికారులు స్పష్టం చేశారు.

ఈ నూతన వీక్లీ పాస్‌లు నగరంలోని అన్ని ప్రధాన సిటీ బస్ సెంటర్లలో ప్రయాణికులకు అందుబాటులో ఉంటాయని ఆర్టీసీ తెలిపింది. రోజువారీ ఉద్యోగులు, వ్యాపారులు మరియు నిత్యం ప్రయాణాలు చేసేవారికి ఈ పథకం ఎంతగానో ఉపయోగపడుతుందని, ఈ అవకాశాన్ని ప్రయాణికులందరూ సద్వినియోగం చేసుకోవాలని ఆర్టీసీ యాజమాన్యం కోరింది.