కొరటికల్‌లో భారీ చోరీ.. 10 తులాల బంగారం, రూ.1.50 లక్షల నగదు మాయం !
ఉప్పునుంతల సూర్య న్యూస్ : ఉప్పునుంతల మండలం కొరటికల్ గ్రామంలో చోరీ ఘటన చోటుచేసుకుంది. గుర్తుతెలియని వ్యక్తులు ఇంటి వెనుక కిటికీని ధ్వంసం చేసి ఇంట్లోకి ప్రవేశించి, 10 తులాల బంగారు ఆభరణాలతో పాటు రూ.1.50 లక్షల నగదును అపహరించారు.గ్రామానికి చెందిన గోపిరెడ్డి భారతమ్మ (70), ఆమె భర్త బచ్చిరెడ్డి (75) శుక్రవారం ఇంటికి తాళం వేసి డిండి గ్రామానికి వెళ్లారు. శనివారం తిరిగి వచ్చి చూడగా, ఇంటి వెనుక కిటికీ ధ్వంసమై ఉండటాన్ని గుర్తించారు. ఇంట్లో పరిశీలించగా సుమారు 7 తులాల బంగారు చంద్రహారం, 3 తులాల బంగారు కంకణాలు, రూ.1.50 లక్షల నగదు కనిపించకపోవడంతో చోరీ జరిగినట్లు గుర్తించి పోలీసులకు సమాచారం అందించారు.సమాచారం అందుకున్న ఉప్పునుంతల ఎస్సై పుట్ట మహేష్ గౌడ్ మరియు క్లూస్ టీం సంఘటనా స్థలాన్ని పరిశీలించి సమాచారాన్ని సేకరించారు. ఘటనపై విచారణ చేపట్టి దర్యాప్తు చేస్తున్నట్లు తెలిపారు.
