కోడిపందాల స్థావరంపై బెజ్జూరు పోలీసుల దాడి
• ఐదుగురు వ్యక్తులు రెడ్‌హ్యాండెడ్‌గా పట్టివేత
• రూ.1,800 నగదు, నాలుగు సెల్‌ఫోన్లు, రెండు ద్విచక్ర వాహనాలు స్వాధీనం
సూర్య, బెజ్జూరు:
కొమురం భీం ఆసిఫాబాద్ జిల్లా బెజ్జూరు పోలీస్‌స్టేషన్ పరిధిలోని పెద్దసిద్దాపూర్ గ్రామ శివారులో అక్రమంగా నిర్వహిస్తున్న కోడిపందాల స్థావరంపై పోలీసులు దాడి నిర్వహించారు. బెజ్జూరు ఎస్ఐ కె. రమేష్ ఆధ్వర్యంలో చేపట్టిన ఈ దాడిలో డబ్బులు పందెంగా పెట్టి, కోళ్లకు కత్తులు కట్టి కోడిపందాలు నిర్వహిస్తున్న ఐదుగురు వ్యక్తులను పోలీసులు రెడ్‌హ్యాండెడ్‌గా పట్టుకున్నారు.
ఈ దాడిలో కోడిపందాల కోసం వినియోగిస్తున్న రూ.1,800 నగదుతో పాటు నాలుగు మొబైల్ ఫోన్లు, రెండు ద్విచక్ర వాహనాలను పోలీసులు స్వాధీనం చేసుకున్నారు. ఈ ఘటనకు సంబంధించి ఐదుగురిపై కేసు నమోదు చేసి, తదుపరి దర్యాప్తు చేపట్టినట్లు ఎస్ఐ కె. రమేష్ వెల్లడించారు.
ఈ సందర్భంగా ఎస్ఐ మాట్లాడుతూ.. కోడిపందాలు నిర్వహించడం, వాటిపై బెట్టింగ్‌లు కాయడం చట్టరీత్యా నేరమని స్పష్టం చేశారు. ఇలాంటి చట్టవిరుద్ధ కార్యకలాపాలకు పాల్పడే వారిపై పోలీసుశాఖ కఠిన చర్యలు తీసుకుంటుందని హెచ్చరించారు. గ్రామీణ ప్రాంతాల్లో ఎక్కడైనా కోడిపందాలు, జూదం, ఇతర అసాంఘిక కార్యకలాపాలు జరుగుతున్నట్లు తెలిస్తే వెంటనే పోలీసులకు సమాచారం అందించాలని సూచించారు. సమాచారం అందించిన వారి వివరాలను గోప్యంగా ఉంచుతామని తెలిపారు.
ప్రజలు చట్టవిరుద్ధ కార్యకలాపాలకు దూరంగా ఉంటూ శాంతిభద్రతల పరిరక్షణలో పోలీసులకు సహకరించాలని ఎస్ఐ కోరారు.
