చేవెళ్ల పీఎంఆర్ హాస్పిటల్‌లో ఫుడ్ పాయిజన్ కలకలం!
నర్సింగ్ హాస్టల్‌లో కలుషిత ఆహారం.. 80 మంది విద్యార్థినిలకు అస్వస్థత, 16 మందికి ఆస్పత్రిలో చికిత్స.. విద్యార్థుల ఆరోగ్యం నిలకడగా ఉందన్న వైద్యులు
ఆసుపత్రిని సందర్శించిన DMHO AO మహమ్మద్ షఫీయోద్దీన్
(రంగారెడ్డి, మేజర్ న్యూస్) రంగారెడ్డి జిల్లా చేవెళ్లలోని పీఎంఆర్ హాస్పిటల్ నర్సింగ్ హాస్టల్‌లో ఫుడ్ పాయిజన్ కలకలం రేపింది. హాస్టల్‌లో భోజనం చేసిన సుమారు 80 మంది నర్సింగ్ విద్యార్థినిలు అస్వస్థతకు గురయ్యారు. వీరిలో 16 మంది విద్యార్థినులు ప్రస్తుతం ఆస్పత్రిలో చికిత్స పొందుతున్నారు. బాధిత విద్యార్థుల ఆరోగ్య పరిస్థితి ప్రస్తుతం నిలకడగానే ఉందని వైద్యులు వెల్లడించారు.
విద్యార్థుల కథనం ప్రకారం.. ఉదయం వండిన చికెన్‌ను రాత్రి భోజనంలో వడ్డించడం వల్లే ఫుడ్ పాయిజన్ జరిగినట్లు అనుమానం వ్యక్తం చేస్తున్నారు. భోజనం చేసిన కొద్దిసేపటికే పలువురు విద్యార్థినిలు అస్వస్థతకు గురికావడంతో ఆస్పత్రిలో చికిత్స అందిస్తున్నారు.
ఇదిలా ఉండగా, రంగారెడ్డి జిల్లా డీఎంహెచ్‌వో ఆస్పత్రిని సందర్శించనున్నారనే సమాచారంతో ఆశా వర్కర్లు కూడా హుటాహుటిన ఆస్పత్రికి చేరుకున్నట్లు తెలిసింది. మరోవైపు, అస్వస్థతకు గురైన విద్యార్థులకు పీఎంఆర్ హాస్పిటల్ యాజమాన్యం తమ సొంత ఆస్పత్రిలోనే చికిత్స అందిస్తోంది.
నర్సింగ్ విద్యార్థినులకు నాణ్యమైన ఆహారం అందించడంలో నిర్లక్ష్యం జరిగిందన్న ఆరోపణలు ఈ ఘటనతో చర్చనీయాంశంగా మారాయి. ఆహారం నాణ్యత, హాస్టల్‌లో పరిశుభ్రత, ఫుడ్ సేఫ్టీ ప్రమాణాలపై అధికారులు విచారణ చేపట్టి బాధ్యులపై చర్యలు తీసుకోవాల్సిన అవసరం ఉంది.
ఇదిలా ఉండగా నర్సింగ్ విద్యార్థినిలు కేరళ గంజిలో చట్నీ వేసుకోవడం వల్ల ఫుడ్ పాయిజన్ అయి ఉండవచ్చని PMR ఆసుపత్రి వర్గాలు అనుమానం వ్యక్తం చేస్తున్నారు. కానీ విద్యార్థినిలు ఉదయం వండిన చికెన్ సాయంత్రం తిన్నామని అందుకే ఇలా జరిగిందని విద్యార్థినిలు పేర్కొంటున్నారు.
DMHO AO మహమ్మద్ షఫీయోద్దీన్ PMR ఆసుపత్రిని ఆదివారం రాత్రి సందర్శించారు. వైద్యులతో మాట్లాడి వివరాలు తెలుసుకున్నారు.
