శిశు మంగళ్ అనాథ ఆశ్రమంలో ఘనంగా దీపావళి వేడుకలు: పిల్లలకు కానుకలు అందజేసిన ఎన్టీఆర్ ట్రస్ట్

సూర్య తెలంగాణ డెస్క్: ప్రముఖ నటుడు, దివంగత ముఖ్యమంత్రి నందమూరి తారక రామారావు, శ్రీమతి బసవతారకం దంపతుల ఆశయాలను ముందుకు తీసుకువెళ్లే లక్ష్యంతో సేవా కార్యక్రమాలు నిర్వహిస్తున్న నందమూరి బసవరామ తారకం ఎన్టీఆర్ చారిటబుల్ ట్రస్ట్ ఆధ్వర్యంలో దీపావళి వేడుకలు అత్యంత ఘనంగా నిర్వహించారు. పండుగ పూట అనాథ పిల్లల మొహంలో చిరునవ్వులు చూడాలనే ఉద్దేశంతో ట్రస్ట్ నిర్వాహకులు నేరుగా తెల్లాపూర్ లోని శిశు మంగళ్ అనాథ ఆశ్రమాన్ని సందర్శించారు. ఈ ప్రత్యేక కార్యక్రమంలో ఆశ్రమంలోని బాలబాలికలతో కలిసి ట్రస్ట్ ప్రముఖులు పండుగ ఆనందాన్ని పంచుకుంటూ చిరస్మరణీయ క్షణాలను గడిపారు.

ట్రస్ట్ చైర్మన్ నందమూరి మోహన కృష్ణ గారి ఆధ్వర్యంలో జరిగిన ఈ కార్యక్రమంలో మేనేజింగ్ ట్రస్టీ నందమూరి మోహన రూప, బోర్డు ట్రస్టీ నందమూరి సీమంతిని తదితరులు ఆశ్రమానికి విచ్చేశారు. పిల్లలతో ముచ్చటించడమే కాకుండా దాదాపు మూడు గంటలకు పైగా వారితో కలిసి గడుపుతూ ఉత్సాహంగా నృత్యాలు చేస్తూ సందడి చేశారు. జై బాలయ్య నినాదాలు, పాటలకు చిన్నారులతో కలిసి సరదాగా గడపడంతో ఆశ్రమం మొత్తం పండుగ వాతావరణంతో కళకళలాడింది. పిల్లలకు స్వయంగా భోజనం వడ్డించి వారితో పాటు భోం చేయడం విశేషం.

యోగా గురువు శ్రీనివాస్ ద్వారా 2012లో తల్లిదండ్రులు లేని అనాథ పిల్లల కోసం ప్రారంభించబడిన ఈ ఆశ్రమం ఎంతోమంది నిస్సహాయ పిల్లలకు ఆశ్రయం కల్పిస్తూ వస్తోంది. ఈ పండుగ సందర్భంగా ఆశ్రమంలోని చిన్నారులందరికీ నూతన వస్త్రాలు, రకరకాల మిఠాయిలు, అలాగే దీపావళి టపాసులను ట్రస్ట్ ప్రతినిధులు బహుకరించారు. చిన్నారులు టపాసులు కాల్చుకుంటూ పండుగను ఆనందంగా జరుపుకోవడాన్ని చూసి నిర్వాహకులు సంతోషం వ్యక్తం చేశారు. సమాజంలో వెనుకబడిన వర్గాలకు, అనాథ పిల్లలకు చేయూతనందించడంలో ఎన్టీఆర్ ట్రస్ట్ ఎప్పుడూ ముందుంటుందని ఈ సందర్భంగా నిరూపితమైంది.

తెలుగు రాష్ట్రాలలో పలు సేవా కార్యక్రమాల ద్వారా ఎంతోమందికి భరోసాని ఇస్తున్న ఈ చారిటబుల్ ట్రస్ట్, పండుగ వేళ పిల్లల జీవితాల్లో వెలుగులు నింపడం పట్ల స్థానికంగా ప్రశంసలు వెల్లువెత్తుతున్నాయి. ఇలాంటి సేవా గుణం గల సంస్థలు మరింత ముందుకు వచ్చి అనాథ పిల్లల అభివృద్ధికి తోడ్పడాలని స్థానికులు కోరుకుంటున్నారు. ట్రస్ట్ ఆధ్వర్యంలో జరిగిన ఈ దీపావళి వేడుకలు చిన్నారుల జీవితంలో ఎప్పటికీ మరువలేని మధుర జ్ఞాపకంగా మిగిలిపోయాయి.

Also Read: ఉత్కంఠ పోరులో భారత్‌పై పాకిస్తాన్ విజయం, అర్జున్ రాజ్పుత్ శతకం వృథా