-కర్దనూరు శిశు విహార్ హైస్కూల్‌లో విద్యార్థినులకు అవగాహన సదస్సు
పటాన్‌చెరు;పటాన్‌చెరు మండలం కర్దనూరు గ్రామంలోని శిశు విహార్ హైస్కూల్‌లో సైబరాబాద్ పోలీస్ షీ టీం ఆధ్వర్యంలో విద్యార్థినులకు మహిళా భద్రత, వ్యక్తిగత రక్షణపై అవగాహన సదస్సు నిర్వహించారు. ఈ సందర్భంగా షీ టీం సబ్‌ ఇన్‌స్పెక్టర్ శ్యాంసుందర్ విద్యార్థినులకు పలు కీలక సూచనలు చేశారు.గుర్తుతెలియని వ్యక్తుల నుంచి ఇబ్బందులు ఎదురైనప్పుడు, ఆపద సమయాల్లో విద్యార్థినులు భయపడకుండా ధైర్యంగా వ్యవహరించాలని ఎస్‌ఐ సూచించారు. ఎవరైనా అసభ్యంగా ప్రవర్తించినా, వేధింపులకు గురిచేసినా వెంటనే తల్లిదండ్రులు, ఉపాధ్యాయులు లేదా నమ్మకమైన స్నేహితులకు తెలియజేయాలని చెప్పారు. బంధువులైనా, బయటివారైనా తప్పుగా ప్రవర్తిస్తే మౌనంగా ఉండకూడదని స్పష్టం చేశారు.మహిళలు,బాలికలు ఎలాంటి వేధింపులకు గురైనా వెంటనే షీ టీం నంబర్ 8712663679కు ఫోన్ చేసి సేవలను వినియోగించుకోవాలని సూచించారు.విద్యార్థులు మొబైల్ ఫోన్ల వినియోగాన్ని తగ్గించి, తల్లిదండ్రుల నమ్మకాన్ని నిలబెట్టుకుంటూ చదువుపై ప్రత్యేక దృష్టి సారించాలని హితవు పలికారు.అంతకుముందు పాఠశాల చైర్మన్ అనిల్ కృష్ణ పిళ్లై, ప్రధానోపాధ్యాయురాలు బినా పిళ్లై ఎస్‌ఐ శ్యాంసుందర్‌ను శాలువాతో సన్మానించి సాదరంగా ఆహ్వానించారు.ఈ కార్యక్రమంలో పాఠశాల చైర్మన్ అనిల్ కృష్ణ పిళ్లై, ప్రధానోపాధ్యాయురాలు బినా పిళ్లై, ఉపాధ్యాయులు, విద్యార్థులు పెద్ద సంఖ్యలో పాల్గొన్నారు.
