కలెక్టరేట్‌లో పండుగ సాయన్న జయంతి.. ఘనంగా నివాళులర్పించిన ఏఎంసీ చైర్మన్ శ్రీనివాస్ ముదిరాజ్
వికారాబాద్ జిల్లా ప్రతినిధి, మేజర్ న్యూస్ : తెలంగాణ రాబిన్‌హుడ్‌గా పేరుగాంచిన పండుగ సాయన్న జయంతిని పురస్కరించుకుని వికారాబాద్ జిల్లా కలెక్టరేట్‌లో గురువారం నిర్వహించిన కార్యక్రమంలో వికారాబాద్ వ్యవసాయ మార్కెట్ కమిటీ (ఏఎంసీ) చైర్మన్ శ్రీనివాస్ ముదిరాజ్ పాల్గొని ఆయన చిత్రపటానికి పూలమాల వేసి ఘనంగా నివాళులర్పించారు. జిల్లా అడిషనల్ కలెక్టర్ వెంకటాచారి ఆధ్వర్యంలో నిర్వహించిన ఈ కార్యక్రమంలో తెలంగాణ రాష్ట్ర ఫైనాన్స్ కమిషన్ సభ్యుడు రంగరాజ్ పాల్గొని పండుగ సాయన్నకు నివాళులర్పించారు.ఈ సందర్భంగా పండుగ సాయన్న చేసిన పోరాటాలు, ఆయన ధైర్యసాహసాలు, ప్రజల పట్ల చూపిన సేవాభావాన్ని స్మరించుకున్నారు. సమాజం కోసం ఆయన చేసిన కృషి, పోరాట స్ఫూర్తి భావితరాలకు ఆదర్శప్రాయమని పేర్కొన్నారు. పండుగ సాయన్న వంటి చారిత్రక వ్యక్తుల జీవిత చరిత్రను యువతకు తెలియజేయడం ద్వారా సామాజిక చైతన్యం, సమానత్వ భావనలు మరింత బలపడతాయని అభిప్రాయపడ్డారు.ఈ కార్యక్రమంలో ముదిరాజ్ సంఘం నాయకులు, అధికారులు, ప్రజాప్రతినిధులు, ఇతర ప్రముఖులు పాల్గొని పండుగ సాయన్నకు ఘనంగా నివాళులర్పించారు.
