జర్నలిస్ట్ భీమనపల్లి శేఖర్ గుండెపోటుతో ఆకస్మిక మృతి టీయూడబ్ల్యూజే, ఐజేయు నేతల నివాళులు

                          
కర్మన్ ఘాట్, మేజర్ న్యూస్ : సీనియర్ జర్నలిస్టు భీమనపల్లి శేఖర్ గుండెపోటుతో ఆకస్మిక మృతి చెందడం బాధాకరమని రాష్ట్ర టియుడబ్ల్యూజే (ఐజేయు) కార్యదర్శి కొంపల్లి శ్రీకాంత్ రెడ్డి విచారం వ్యక్తం చేశారు. సోమవారం శేఖర్ మృతి చెందిన విషయాన్ని తెలుసుకున్న శ్రీకాంత్ రెడ్డి, టీయూడబ్ల్యూజే నేతలు స్వగ్రామం వెలమకన్నే కు వెళ్ళి భౌతిక కాయాన్ని సందర్శించి పూల మాలలు వేసి నివాళులు అర్పించారు. శేఖర్ కుటుంబ సభ్యులను ఓదార్చి, భవిష్యత్తులో శేఖర్ కుటుంబానికి అన్ని విధాలుగా అండగా ఉంటామని ప్రెస్ అకాడమీ తరపున తగిన సహాయ సహకారాలు అందించడానికి కృషి చేస్తానని శ్రీకాంత్ రెడ్డి హామీ ఇచ్చారు. అనంతరం శేఖర్ కుటుంబానికి రూ.10 వేల ఆర్థిక సాయం అందజేశారు.

 శేఖర్ ప్రజాశక్తి, సూర్య తదితర పత్రికలో ఎల్బీనగర్ నియోజకవర్గం మన్సురాబాద్ విలేకరిగా సేవలందించారు. ఆదివారం రాత్రి తీవ్ర గుండెపోటుతో ఆకస్మికంగా కన్నుమూశారు. ఆయన మృతి పట్ల పాత్రికేయ లోకం దిగ్భ్రాంతి వ్యక్తం చేసింది. నల్గొండ జిల్లా సంస్థాన్ నారాయణపురం మండలం వెలమకన్నే గ్రామము శేఖర్ స్వస్థలం. ఈ సందర్భంగా కొంపల్లి శ్రీకాంత్ రెడ్డి మాట్లాడుతూ.. శేఖర్ మృతి జర్నలిస్ట్ రంగానికి తీరని లోటని విచారం వ్యక్తం చేశారు. శేఖర్ కుటుంబానికి టీయూడబ్ల్యూజే ఎల్లప్పుడూ అండగా ఉంటుందని భరోసానిచ్చారు. తెలంగాణ ప్రెస్ అకాడమీ నుంచి బాధిత కుటుంబానికి తగిన ఆర్థిక సహాయం అందేలా శాయశక్తులా కృషి చేస్తామని హామీ ఇచ్చారు. ఈ నివాళులర్పించిన వారిలో టీయూడబ్ల్యూజే (ఐజేయు) రంగా రెడ్డి జిల్లా కార్యదర్శి మేకల సత్యనారాయణ, రాష్ట్ర కౌన్సిల్ సభ్యులు జే.కిషన్ (రాధా కిషన్), జిల్లా సంయుక్త కార్యదర్శి బోల్లంపల్లి ఆంజనేయులు, ట్రెజరర్ శశిపాల్ రెడ్డి, సీనియర్ జర్నలిస్టులు బాణాల మధుసూదనాచారి, చాపల శ్రీనివాస్, నర్రి రమేష్, దేవయ్య, దుర్గయ్య తదితరులు ఉన్నారు.