ఇందిరమ్మ ఇంట్లో దీపావళి వేడుకలు.. పాల్గొన్న ఎమ్మెల్సీ దండే విఠల్

సూర్య, పెంచికల్‌పేట్: మండలంలోని ఎల్కపల్లి గ్రామంలో నూతనంగా నిర్మించుకున్న ఇందిరమ్మ ఇంట్లో దీపావళి వేడుకలు ఘనంగా నిర్వహించారు. గ్రామానికి చెందిన రమేష్–స్వరూప దంపతుల నూతన గృహంలో జరిగిన ఈ వేడుకలకు ఉమ్మడి ఆదిలాబాద్ జిల్లా స్థానిక సంస్థల ఎమ్మెల్సీ దండే విఠల్ ముఖ్య అతిథిగా హాజరయ్యారు.ఈ సందర్భంగా ఎమ్మెల్సీ నూతన గృహంలో నిర్వహించిన పూజా కార్యక్రమాల్లో పాల్గొని, రమేష్–స్వరూప దంపతులకు శుభాకాంక్షలు తెలిపారు. అనంతరం గ్రామస్తులు, స్థానిక నాయకులు శాలువాతో ఎమ్మెల్సీని ఘనంగా సత్కరించారు.ఈ సందర్భంగా దండే విఠల్ మాట్లాడుతూ.. ఇందిరమ్మ ఇళ్లు పేదల సొంతింటి కలను సాకారం చేయడంతో పాటు వారి ఆత్మగౌరవానికి ప్రతీకగా నిలుస్తున్నాయని అన్నారు. అర్హులైన ప్రతి పేద కుటుంబానికి సొంత గృహం కల్పించడమే ప్రభుత్వ లక్ష్యమని పేర్కొన్నారు. నూతన గృహంలో అడుగుపెట్టిన రమేష్–స్వరూప దంపతులకు దీపావళి శుభాకాంక్షలు తెలియజేశారు.

- సీఎం జన్మదిన వేడుకలు : అనంతరం ముఖ్యమంత్రి ఎనుముల రేవంత్ రెడ్డి జన్మదినాన్ని పురస్కరించుకుని కేక్ కట్ చేసి సంబరాలు నిర్వహించారు. సీఎం రేవంత్ రెడ్డి ఆయురారోగ్యాలతో నిండు నూరేళ్లు ప్రజాసేవలో కొనసాగాలని ఎమ్మెల్సీ ఆకాంక్షించారు.

ఈ కార్యక్రమంలో పెంచికల్‌పేట్ మండల కాంగ్రెస్ పార్టీ అధ్యక్షుడు సముద్రాల రాజన్న, ఉపాధ్యక్షుడు చంద్రకాంత్, ఎల్కపల్లి సర్పంచ్ రాంచందర్, పెంచికల్‌పేట్ సర్పంచ్ షేక్ ఉస్మాన్, గ్రామ కార్యదర్శి, మండల నాయకులు రాచకొండ కృష్ణ, రమేష్, చంద్రమౌళి, సంతోష్, రాజన్న, అత్తహ బెగి, కొల్లిపాక శ్రీను, బాబాజీతో పాటు ప్రజాప్రతినిధులు, గ్రామ పెద్దలు, మహిళలు పాల్గొన్నారు.