ఇందిరమ్మ ఇళ్లతో పేదల సొంతింటి కల సాకారం సొంతింటిలో దీపావళి జరుపుకోవడం ఆనందదాయకం: కలెక్టర్ భవేష్ మిశ్రా

సూర్య నిర్మల్ జిల్లా ప్రతినిధి:

ఇల్లు లేని పేదలందరికీ సొంతింటి కల నెరవేర్చడమే ప్రభుత్వ లక్ష్యమని జిల్లా కలెక్టర్ భవేష్ మిశ్రా అన్నారు. ఆదివారం బాసర మండలం లాబ్ధి గ్రామంలో నిర్వహించిన ‘మా ఇందిరమ్మ ఇంట్లో దీపావళి’ కార్యక్రమంలో భాగంగా లబ్ధిదారు అనూష బాయి–నర్సింగ్ కుటుంబంతో కలిసి వారి నూతన గృహంలో దీపావళి వేడుకల్లో పాల్గొన్నారు. కుటుంబ సభ్యులకు శుభాకాంక్షలు తెలిపి, పిల్లలకు మిఠాయిలు, టపాసులు, నోటుపుస్తకాలు అందజేశారు.

ఈ సందర్భంగా కలెక్టర్ మాట్లాడుతూ.. ఇందిరమ్మ ఇళ్ల పథకంతో పేద కుటుంబాల్లో సొంతింటి ఆనందం వెల్లివిరుస్తోందని, లాబ్ధి గ్రామం ఇళ్ల నిర్మాణంలో ఆదర్శంగా నిలుస్తోందని ప్రశంసించారు. గ్రామ సమస్యలను అడిగి తెలుసుకుని, పరిష్కారానికి చర్యలు తీసుకోవాలని అధికారులను ఆదేశించారు. ఉపాధి హామీ పనులను గ్రామస్తులు సద్వినియోగం చేసుకోవాలని సూచించారు.

కార్యక్రమంలో హౌసింగ్ పీడీ శ్రీనివాస్, ఎంపీవో గంగాసింగ్, సర్పంచ్ శంకర్, అధికారులు, గ్రామస్తులు పాల్గొన్నారు.