telangana
హైదరాబాద్లో భారీ డ్రగ్స్ దందా గుట్టురట్టు..
హైదరాబాద్, నవంబర్ 18: సోషల్ మీడియా వేదికగా సాగుతున్న భారీ డ్రగ్స్ రాకెట్ను హైదరాబాద్ పోలీసులు భగ్నం చేశారు. స్నాప్చాట్ (Snapchat) యాప్ ద్వారా రహస్యంగా డ్రగ్స్ దందా నిర్వహిస్తున్న ముగ్గురు డ్రగ్ పెడ్లర్లను అరెస్ట్ చేశారు. వారి నుంచి 1.240 కిలోల గంజాయితో పాటు 16.59 గ్రాముల ఖరీదైన 'ఓజీ కుష్' (OG Kush) డ్రగ్ను స్వాధీనం చేసుకున్నారు.
పోలీసులు తెలిపిన వివరాల ప్రకారం.. నిందితులు మణికొండ ల్యాంకో హిల్స్ ప్రాంతం నుంచి కారులో డ్రగ్స్ తరలిస్తుండగా పక్కా సమాచారంతో పోలీసులు అదుపులోకి తీసుకున్నారు. వీరు 'OGdude420', 'Dude OG 420' అనే పేర్లతో స్నాప్చాట్లో ప్రత్యేక ఖాతాలను నిర్వహిస్తూ, యువతను టార్గెట్ చేసుకుని డ్రగ్స్ విక్రయిస్తున్నారు. ఇప్పటివరకు దాదాపు 800 నుంచి 900 మంది కస్టమర్లకు వీరు డ్రగ్స్ సరఫరా చేసినట్లు పోలీసుల విచారణలో వెల్లడైంది. నిందితులపై కేసు నమోదు చేసి దర్యాప్తు కొనసాగిస్తున్నారు.