గ్రామపంచాయతీ సిబ్బందికి దుస్తుల పంపిణీ

గీసుగొండ , మేజర్ న్యూస్, గ్రామాల పరిశుభ్రత, పురోగతిలో గ్రామ పంచాయతీ సిబ్బంది అందిస్తున్న సేవలు అపారమని, వారి కష్టాన్ని గుర్తించి ఆదుకోవడం ప్రతి ఒక్కరి బాధ్యత అని నిమ్స్ ఆసుపత్రి లైజనింగ్ ఆఫీసర్,  డాక్టర్ మార్త రమేష్ అన్నారు. విజయదశమి పండుగను పురస్కరించుకుని గీసుకొండ మండలం ఎలుకుర్తి హవేలీ గ్రామంలోని గ్రామ పంచాయతీ కార్యాలయంలో విధులు నిర్వహిస్తున్న సిబ్బందికి ఆయన దసరా కానుకగా నూతన వస్త్రాలను పంపిణీ చేశారు.ఈ సందర్భంగా డాక్టర్ మార్త రమేష్ మాట్లాడుతూ  రాత్రింబవళ్లు తేడా లేకుండా గ్రామీణ ప్రాంత ప్రజలకు మెరుగైన సేవలందిస్తూ, ఊరి పరిశుభ్రతకు శ్రమిస్తున్న పంచాయతీ సిబ్బంది సేవలు మరువలేనివని కొనియాడారు. పండుగ పూట వారి ముఖాల్లో ఆనందం చూడాలనే ఉద్దేశంతోనే ప్రతి ఏటా ఈ రకమైన సేవా కార్యక్రమాలు నిర్వహిస్తున్నట్లు తెలిపారు. భవిష్యత్తులోనూ గ్రామానికి, గ్రామీణ పేదలకు తన వంతు సహాయ సహకారాలు ఎల్లప్పుడూ ఉంటాయని ఆయన హామీ ఇచ్చారు.
పంచాయతీ సిబ్బందికి పండుగ కానుకగా దుస్తులు అందజేసి, వారిలో పండుగ ఉత్సాహాన్ని నింపిన దాత డాక్టర్ మార్త రమేష్‌కు స్థానిక నాయకులు, పంచాయతీ పాలకవర్గం,సిబ్బంది ప్రత్యేక కృతజ్ఞతలు తెలిపారు.ఈ కార్యక్రమంలో గ్రామ ఉప సర్పంచ్ నల్ల సురేష్ బాబు,నాయకులు దుకిరే రమేష్, కారోబార్ శంకర్,గ్రామ పంచాయతీ సిబ్బంది, స్థానిక  వార్డు సభ్యులు తదితరులు పాల్గొన్నారు.

రిపోర్టర్: చందర్, వరంగల్ జిల్లా