విజయదశమి సందర్భంగా అఖండ అన్న సమారాధన ప్రారంభం కేంద్ర మంత్రి శ్రీనివాస వర్మ సతీమణి వెంకట శ్రీదేవి చేతుల మీదుగా ప్రారంభం

భీమవరం, సూర్య న్యూస్:విజయదశమి పర్వదినాన్ని పురస్కరించుకుని భీమవరం 24వ వార్డు రామాయణం సుబ్బన్నవారి తోటలోని గురు భవాని అధికారి వెంకన్న, దుర్గాలక్ష్మి అమ్మవారి దీక్ష పీఠం వద్ద అఖండ అన్న సమారాధనను ఘనంగా నిర్వహించారు. కేంద్ర ఉక్కు, భారీ పరిశ్రమల శాఖ సహాయ మంత్రి భూపతిరాజు శ్రీనివాస వర్మ సతీమణి వెంకట శ్రీదేవి ఈ కార్యక్రమాన్ని ప్రారంభించారు.

శ్రీశ్రీశ్రీ దేవి శరన్నవరాత్రి ఉత్సవాల్లో భాగంగా తొమ్మిది రోజులపాటు అమ్మవారికి విశేష పూజలు, కుంకుమార్చనలు, పంచామృత అభిషేకాలు, భజనలు నిర్వహించినట్లు గురుభవాని అధికారి వెంకన్న తెలిపారు. ఆదివారం నిర్వహించిన సామూహిక చండీ హోమం విజయవంతంగా పూర్తయిందన్నారు. ఉత్సవాల నిర్వహణకు సహకరించిన భవానీలు, భక్తులు, మీడియా ప్రతినిధులకు కృతజ్ఞతలు తెలిపారు.

పీఠంలోని భవానీలంతా భక్తిశ్రద్ధలతో పూజా కార్యక్రమాల్లో పాల్గొని దీక్షను పరిపూర్ణం చేసుకున్నారని లాయర్ వంశీ భవాని పేర్కొన్నారు. అన్న సమారాధనకు ఆర్థికంగా, ఇతర రూపాల్లో సహకరించిన దాతలకు నిర్వాహకులు ప్రత్యేక ధన్యవాదాలు తెలిపారు. బుధవారం అమ్మవారి ఊరేగింపు, నిమజ్జన కార్యక్రమాలు నిర్వహించనున్నట్లు వెల్లడించారు.

ఈ కార్యక్రమంలో భవానీలు, అయ్యప్ప, శివ స్వాములు, ఇతర దీక్షాపరులు, భక్తులు పెద్ద సంఖ్యలో పాల్గొన్నారు.