కూటమి అభ్యర్థుల విజయమే లక్ష్యంగా పనిచేయాలి భీమవరం జెడ్పీటీసీగా కత్తుల సిరి మహాలక్ష్మి, వీరవాసరం ఎంపీపీగా భోగిరెడ్డి శ్రీనివాసరావు

భీమవరం సూర్య న్యూస్: రానున్న ఎంపీటీసీ, జెడ్పీటీసీ ఎన్నికల్లో కూటమి అభ్యర్థులను 100 శాతం స్ట్రైక్ రేట్‌తో గెలిపించుకునేందుకు నాయకులు, కార్యకర్తలు సమష్టిగా కృషి చేయాలని రాష్ట్ర పబ్లిక్ అకౌంట్స్ కమిటీ చైర్మన్, ఎమ్మెల్యే పులపర్తి రామాంజనేయులు (అంజిబాబు) పిలుపునిచ్చారు. మంగళవారం భీమవరంలోని తన కార్యాలయంలో భీమవరం, వీరవాసరం మండలాల కూటమి అభ్యర్థులను ఆయన ప్రకటించారు.

భీమవరం మండల జెడ్పీటీసీ అభ్యర్థిగా జనసేన నాయకుడు కత్తుల నీలేంద్ర సతీమణి కత్తుల సిరి మహాలక్ష్మిని, వీరవాసరం మండల ఎంపీపీ అభ్యర్థిగా జనసేన నాయకుడు భోగిరెడ్డి శ్రీనివాసరావును ప్రకటించారు. కూటమి నేతల మధ్య సుదీర్ఘ చర్చల అనంతరం ఏకాభిప్రాయంతో అభ్యర్థులను ఖరారు చేసినట్లు తెలిపారు.

సీట్ల సర్దుబాటులో భాగంగా భీమవరం మండలంలో బీజేపీకి ఒకటి, టీడీపీకి తొమ్మిది, జనసేనకు ఎనిమిది ఎంపీటీసీ స్థానాలు కేటాయించారు. వీరవాసరం మండలంలో బీజేపీకి ఒకటి, టీడీపీకి ఎనిమిది, జనసేనకు పది ఎంపీటీసీ స్థానాలు కేటాయించినట్లు వెల్లడించారు. భీమవరం జెడ్పీటీసీ, వీరవాసరం ఎంపీపీ స్థానాలను జనసేనకు, భీమవరం ఎంపీపీ, వీరవాసరం జెడ్పీటీసీ స్థానాలను టీడీపీకి కేటాయించినట్లు పేర్కొన్నారు.

కూటమి అభ్యర్థుల విజయమే ధ్యేయంగా ప్రతి ఒక్కరూ సమన్వయంతో పనిచేసి ఎన్నికల్లో ఘన విజయం సాధించాలని అంజిబాబు కోరారు. ఈ కార్యక్రమంలో కూటమి నాయకులు, కార్యకర్తలు, అభిమానులు, వీర మహిళలు, తెలుగు మహిళలు పాల్గొన్నారు.